Hjalti Búi Önnuson er alvarlega veikur eftir að hann fékk streptókokkasýkingu í vöðva sem leiddi til fjöllíffærabilunar. Hann er 36 ára og fjögurra barna faðir. Nýverið eignaðist hann sitt annað barn saman með Eddu Báru Höskuldsdóttur, sem er í fæðingarorlofi.
Söfnun fyrir fjölskyldu Hjalta hefur verið sett á stað hans bíður erfið endurhæfing á Grensás næstu fimm mánuði.
Birna Björnsdóttir, vinkona Eddu Báru og Hjalta, setti söfnunina á stað og segir Birna veikindin hafa verið mikið áfall og álag á fjölskylduna.
„Hjalti var í blóma lífsins, hörku duglegur og mikill gleðigjafi. Álagið var mikið á fjölskyldunni fyrir þetta áfall sem á þau skall og strembnir tímar framundan. Hann var í mikilli hættu og honum haldið sofandi á gjörgæsludeild, með mikinn hita, sýkingu og miklar líffærabilanir. Hjartað var komið að þrotum, nýru störfuðu ekki sem skyldi, lungu og svo mætti lengi telja,“ segir Birna og bætir við:
Ljóst er að Hjalti þarf mikla endurhæfingu og framundan er langt og strangt bataferli þar sem hann er á leið á Grensás. Hjalti er gaurinn sem mun rústa þessu, mun verða erfitt, mun taka tíma en mín trú er sú að hann verði betri en nokkru sinni fyrr. Áfallið fyrir þessa dásamlegu fjölskyldu er mikið, mikill auka kostnaður fylgir svona veikindum og bætir nú ekki úr skák að þurfa að hafa áhyggjur af því að ná endum saman. Elsku vinir, margt smátt gerir eitt stórt. Ef þið hafið tök á að létta undir með fjölskyldunni á þessum erfiðu tímum þá yrði það svo ofboðslega vel þegið og auk þess efast ég ekki um annað en að karma muni gefa ykkur gullklumpa í karmabankann ykkar.“
Ef þú vilt leggja fjölskyldunni lið á þessum erfiðu tímum, þá finnur þú upplýhsingar um söfnunarreikninginn hér fyrir neðan:
Reikningsnúmer: 0162-05-261144
Kennitala: 0201852879
Athugasemdir