Neytandi vikunnar varar við eyðslupúkanum á öxlinni: Sparar allt árið fyrir jólagjöfunum

Neytandi vik­unnar að þessu sinni er Dagbjört Jóns­dóttir. Dagbjört er 39 ára lög­fræð­ingur, eig­in­kona og móðir og er búsett í Mos­fells­bænum.  

Dagbjört heldur úti miðl­inum Fundið fé (https://www.instagram.com/fundid_fe/) á Instagram þar sem hún setur inn ýmsan fróð­leik og hvatn­ingu varð­andi  sparnað, útgjöld og pen­inga. Dagbjört gaf sér tíma til að svara nokkrum spurn­ingum um neyslu­venjur sínar. 

Leggur þú fyrir og ef svo er hvaða leiðir notar þú ?  

Mér finnst skipta miklu máli að leggja fyrir mán­að­ar­lega, alveg sama hversu lítil sú upp­hæð kann að vera. Ég legg fyrir í sparnað í hverjum mán­uði. Ég legg líka til hliðar pen­ing í útgjalda­flokka sem ég veit að ég þarf að eiga fyrir, t.d. jóla­gjafir, tóm­stundir barna o.s.frv. Þannig hefur það ekki áhrif á útgjöld mán­að­ar­ins þegar þessi kostn­aður bæt­ist við. 

Inn á heima­bank­anum er hægt að koma á sjálf­virkum milli­færslum. Ég mæli heils hugar með að nýta sér þessa þjón­ustu því ann­ars getur eyðslu­púk­inn á öxl­inni sann­fært þig að eyða pen­ingnum í eitt­hvað skemmti­legt núna frekar en að geyma hann fyrir eitt­hvað skyn­sam­legt seinna.   

Hvar kaupir þú helst í mat­inn og hvað hefur þú í huga í mat­ar­inn­kaupum, sem neyt­andi?  

Fyrir mitt leyti hentar mér best að gera vikuinn­kaupin á net­inu, sér­stak­lega þegar mikið er að gera og ég hef ekki tíma til þess að fara í búð. Með því að kaupa í mat­inn á net­inu get ég keypt í mat­inn út frá stöð­unni í skáp­unum heima og ákveð kvöld­verði vik­unnar út frá því sem er til. Yfir­leitt kaupi ég minna en ég hefði gert í hefð­bund­inni mat­vöru­verslun og ég er miklu með­vit­aðri um hvað ég kaupi. 

Þegar ég fer í búð­ina þá vel ég oft­ast að nota „Skannað og skundað” frá Krónunni. Þannig sé ég nákvæm­lega hvað karfan mín mun kosta og er síður lík­leg til að setja eitt­hvað í körf­una sem mig vantar ekki. Svo þarf ég aldrei að bíða í röð á kassa til að borga! Gott trix til að gera búð­ar­ferð­ina bæri­legri er að hlusta á upp­á­halds hlað­varps­þátt­inn þinn á meðan þú ert í búð­inni. Það hefur marg­sinnis hjálpað mér að koma mér af stað í búð­ar­inn­kaupin þegar ég nenni engan vegin af stað. 

Ég nýti mér stundum mat­ar­pakka með til­búnum kvöld­verðum þó það sé vissu­lega mun­aður en ekki sparn­aður. Ég finn hins vegar að ég fer miklu sjaldnar í búð­ina þegar ég panta  þessa þjón­ustu. Ég hef líka oft pantað kvöld­verði fyrir tvo þó við séum fjögur í heim­ili og bæti þá ein­fald­lega við auka með­læti. Þannig helm­inga ég kostn­að­inn en ein­falda mér lífið með því að þurfa ekki að taka ákvörðun um hvað eigi að vera í mat­inn.  

Hvert er þitt helsta sparn­að­ar­ráð?  

Mitt helsta sparn­að­ar­ráð er að skrifa niður öll þín útgjöld og fara viku­lega yfir þau. Með því að hafa þessa yfir­sýn og skoða það sem þú eyðir áttar þú þig betur á hvað má betur fara. Þannig ertu ólík­legri til að end­ur­taka inn­kaup sem þig langar að forð­ast. Vertu með fjár­hags­leg mark­mið að hverju þú stefnir og mát­aðu þín inn­kaup við þessi mark­mið. Þú skalt alltaf spyrja þig: eru þessi inn­kaup að draga mig nær eða fjær mínum mark­miðum?  

Umhverf­is­vernd, skiptir hún þig máli? 

Umhverf­is­vernd á erindi við alla og ég reyni að leggja mig fram hvað það varðar. Á okkar heim­ili er einn bíll þó það getur vissu­lega verið púslu­spil í úthverfa­líf­inu en hefur gengið upp fyrir okkur. Ég kaupi iðu­lega notuð hús­gögn og það sama á við um föt. Ég er mik­ill aðdá­andi Barna- og Extra­lopp­unnar og kaupi flest mín föt þar. Ég kaupi líka notuð föt þegar ég fer erlendis. Sem betur fer telst það varla frétt­næmt í dag að kaupa sér hluti sem ekki eru nýir, en ég held að við þurfum öll að taka höndum saman sem neyt­endur að huga að hvaða áhrif okkar inn­kaup hafa á umhverfið, hvort sem það eru föt, bílar eða matur.  

Mælir þú með skemmti­legu les­efni eða hlað­vörpum? 

Ég elska að hlusta á skemmti­leg hlað­vörp sem fjalla um sparnað og fjár­mál og hefur “Leitin að pen­ing­unum” verið í sér­stöku upp­á­haldi hjá mér. Eins þykir mér gaman að hlusta á The Minima­lists Podcast. Það eru einnig til margar góðar bækur en ég mæli sér­stak­lega með bók­inni “Atomic habits” fyrir þá sem vilja taka skrefið í átt að betri venjum, til dæmis í fjár­málum. 

Dagbjört hefur síð­ast­liðin ár verið að þróa og hanna bók fyrir fólk til að halda utan um útgjöldin sín með skipu­lögðum hætti og ná yfir­sýn yfir fjár­málin. Bókin er vænt­an­leg í versl­anir í næsta mán­uði og  ber heitið „ Fundið fé, njóttu ferða­lags­ins“  Í bók­ina skráir fólk niður útgjöld sín viku fyrir viku og skoðar sam­hliða hvort eyðsla þeirra end­ur­spegli sínar áherslur og fjár­hags­leg mark­mið.  Hugsunin er að fá þá sem nota bók­ina með í fjár­hags­legt ferða­lag þar sem að það lærir inn á hvað skiptir það mestu máli, hvernig er best að for­gangs­raða í hvað það vill eyða pen­ing­unum sínum með því að setj­ast niður með útgjöldum sínum í ein­ungis fimm mín­útur á dag.