Sólveig Anna Jónsdóttir, formaður Eflingar, segir á Facebook að meirihlutinn í Reykjavík standi fyrir mannhaturstefnu sem láti niðurskurð bitna á þeim sem minnst mega við því. Hún segir áform meirihlutans, sem Dagur B. Eggertsson borgarstjóri leiðir, séu einfaldlega árás á viðkvæmustu ungmenni Reykjavíkur.
„Borgarstjórnarmeirihlutinn er eins og uppvakningur Margaretar Thatcher. Ætlar að innleiða niðurskurðar-regime að hætti mannhatursstefnu breska íhaldsins. Þrátt fyrir að öll heimsbyggðin viti að ekkert er meira samfélagslegt eitur en sú sturlaða afstaða til mannlegs samfélags,“ segir Sólveig og heldur áfram:
„Þau ráðast á leikskólana okkar, og að okkar viðkvæmustu ungmennum; þeim sem upplifa félagslega einangrun og þurfa mest af öllum á raunverulegu velferðakerfi sem styður þau að halda. Og til að kóróna firringuna ætla þau að eyðileggja Siglunes þar sem að börn geta lært að sigla fyrir svo lágt verð að næstum allt fólk hefur efni á að senda börnin sín til að upplifa örugg ævintýri á sjó.“
Að lokum segist hún vona þessu verði mótmælt, því á þau mótmæli muni hún mæta. „Ég vona að verið sé að skipuleggja mótmæli gegn þessum yfirgengilegum skemmdarverkum. Ég mun sannarlega mæta á þau. Það verður einfaldlega að stoppa þetta niðurrif á sameiginlegum innviðum okkar.“
Athugasemdir