Ekki er óþekkt að lögreglumenn jafnt sem aðrir gerist brotlegir í starfi. Mál af þeim toga rata ekki alltaf í dómsal. Tveir lögreglumenn sátu þó undir kæru fyrir fimm brot í starfi, með því að hafa meðal annars notast við táragas að óþarfa og síðan logið til um aðstæður í skýrslu til að réttlæta brot sín.
„Tveir lögreglumenn í Reykjavík hafa verið ákærðir fyrir fimm saknæm brot í starfi. Öðrum þeirra er gefið að sök að hafa fjórum sinnum átt þátt í brotunum en í það fimmta er hinn m.a. ákærður fyrir að skrá ranglega að „mikil múgæsing hafi myndast á vettvangi“ til að réttlæta að nauðsynlegt hefði verið að nota úðavopn (mace) til þess að lögregla kæmist af vettvangi.
Annar lögreglumannanna lýsti því yfir fyrir dómi í gær að um 300 lögreglumenn biðu niðurstöðu í þessu dómsmáli því mætti búast við að fjöldi lögreglumanna myndi mæta þegar réttað yrði með viðeigandi yfirheyrslum. Var látið í það skína, þegar málið var tekið fyrir í gær, að ekki yrði nægilegt rými fyrir tilheyrendur í komandi réttarhöldum sem fara fram þann 7. október,“ segir í frétt DV frá árinu 2003
Ríkissaksóknari var með mál mannana til rannsóknar í nokkra mánuði áður en ákæra var gefin út.
Mennirnir voru sagðir hafa beitt ólöglegum handtökum, falsað skýrslur og gerst brotlegir í opinberu starfi. Brotaþolar í málinu voru þrír.
Annar mannana var ákærður fyrir að handtaka og færa 23 ára mann í fangaklefa á Hverfisgötu, án ástæðu né heimildar.
Næstu nótt voru mennirnir tveir sem ákærðir voru, saman á Tryggvagötu. Þar handtóku þeir 32 ára karlmann og færðu hann á lögreglustöðina, án nægilegra ástæðna.
Þriðja brotið varð í sama máli, annar lögreglumannana skráði rangar upplýsingar við skýrslugerð:
„Þar hafi hann skráð að mikil múgæsing hafi myndast á vettvangi, ástandið verið mjög eldfimt og að notkun úðavopns hafi verið nauðsynleg til að lögregla kæmist af vettvangi án þess að til frekari átaka kæmi.“
Í fjórða málinu var annar mannanna kærður fyrir að hafa notað úðavopn á 31 árs karlmann, án nægilegs tilefnis. Þá hafi hann skráð rangar upplýsingar í skýrslu.
Mönnunum var báðum sagt upp störfum um leið og rannsókn á þeim hófst.
Þeir voru síðar dæmdir skilorðsbundið fangelsi, annar þeirra í fimm mánuði og hinn í þrjá mánuði.
Einnig var þeim gert að greiða einum mannanna sem þeir handtóku 100 þúsund krónur í bætur og 60 þúsund krónur fyrir málskostnaði mannsins.
Þá voru þeir dæmdir til að greiða verjendum sínum 700 þúsund krónur í málsvarnarlaun.
Athugasemdir