Hannes Sigurbjörn Jónsson er formaður Körfuknattleikssambands Íslands, KKÍ, segir að „við færumst alltaf nær og nær þeim veruleika að þjóðarhöll rísi í Laugardalnum sem er mjög jákvætt. Það eru örugglega einhverjir orðnir þreyttir á röflinu í mér fyrir þessu mjög mikilvæga verkefni fyrir íslenskt íþróttalíf.“
Hann bætir við:
„Það hefur verið áhugavert að fá að taka þátt í þessu stóra verkefni og hlakka ég til næstu vikna, mánuða og ára við að láta draum rætast um þjóðarhöll fyrir inniíþróttir sem mun nýtast flestum ef ekki öllum íþróttagreinum landsins með einum eða öðrum hætti og svo starfsemi íþróttafélaganna Ármanns og Þróttar.“
Hannes segir að „það er mikið verk framundan, það er alveg á hreinu. Mjög margir hafa spurt og rætt við mig hvernig daglegur rekstur eigi að vera svo þjóðarhöll standi undir sér fjárhagslega því það er ekki nóg að hafa æfingar og keppni í svona mannvirki svo það borgi sig og hafa því efasemdir um að reksturinn muni standa undir sér.
Fyrir mér verður þetta hús íþrótta með margþætta starfsemi eins og; skrifstofur sérsambanda, fundaraðstaða sérsambandanna, afreksíþróttamiðstöð með heilbrigðis og styrktarteymi fyrir íþróttafólk, rými fyrir háskólanna, veitingaaðstaða og fleira. Þannig gerur daglegur rekstur þjóðarhallar gengið ansi vel.“
Á mánudaginn síðasta kynntu forsætisráðherra, ráðherra íþróttamála og borgarstjóri stöðuna á verkefninu:
„Ég fékk að ræða stöðuna í beinni útsendingu í kvöldfréttatíma Stöðvar2 og RÚV. Mörgum finnst tímaramminn vera knappur sem hefur verið gefinn út um að þjóðarhöllin eigi að vera klár í lok árs 2025. Ég skil vel að margir séu efins en þetta er hægt ef allir sem að verkefninu koma leggjast á eitt og halda áfram í sömu átt við að leysa þau mál sem upp koma. Núna skiptir mjög miklu máli að fjármögnun ríkis og borgar liggi fyrir á næstu vikum að öðrum kosti mun þjóðarhöll ekki vera komin í gang í lok árs 2025.“
Athugasemdir