Einar Þorsteinsson verðandi borgarstjóri: „Það var sett af stað herferð gegn mér“

Oddviti Fram­sókn­ar­flokks­ins í borg­ar­stjórn, verð­andi borg­ar­stjóri og fyrrum sjón­varps­stjarnan Einar Þor­steins­son, var gestur í Silfrinu í morgun.

Hann tjáði sig um það sem honum finnst hafa verið sam­fé­lags­miðla­her­ferð sem sett var á lagg­irnar til höf­uðs honum er hann stýrði Kast­ljósi, en þetta kemur fram í DV.

Einar vís­aði til umdeilds við­tals sem hann tók við Kára Stef­áns­son árið 2021:

„Það var bara sett af stað ákveðin her­ferð gegn mér af því ég var gagn­rýn­inn á ákveðnar aðgerðir,“ segir Einar en þess má geta að við­talið var tekið í miðjum Covid-far­aldr­inum.

Í máli Einars kom fram að Facebook-færslu sem var skrifuð gegn honum hafi verið deilt þús­und sinnum á ein­ungis einni klukku­stund:

„Ef fólk telur hags­munum sínum ógnað þá sækir það fram,“ sagði hann og benti á að emb­ætt­is­menn og stjórn­mála­menn væru oft­lega sett undir gíf­ur­legan þrýst­ing frá hags­muna­sam­tökum sem og ein­stak­lingum sem nýttu sér sam­fé­lags­miðla til að breiða út boð­skap sinn.

Kemur fram á DV að til­efni orða Einars var umræða í þætt­inum um áform Katrínar Jak­obs­dóttur for­sæt­is­ráð­herra að skylda kjörna full­trúa sem og opin­bera starfs­menn til að sækja nám­skeið um hat­urs­orð­ræðu; hyggst Katrín leggja fram þings­á­lykt­un­ar­til­lögu um þetta.