Brynjar Níelsson, varaþingmaðúr og stallari dómsmálaráðherra, á það til að vera með fyndnari mönnum. Um helgina var hann á ferð með rokkrútu Sjálfstæðisflokksins sem fer um landið með þingmenn og aðstoðarfólk í því skyni að hífa fylgi flokksins yfir Samfylkinguna sem fer með himinskautum undir stjórn Kristrúnar Frostadóttur.
Talsvert óyndi hefur verið innan Sjálfstæðisflokksins eftir að Guðlaugur Þór Þórðarson skoraði þann umdeilda Bjarna Benediktsson á hólm í formannskjöri og náði um 40 prósenta fylgi. Brynjar lýsir ferðalagi sjálfstæðismanna í óveðrinu með grafískum hætti. Veðurhræddur Guðlaugur kúldrast aftast í rútunni. „Umhverfisráðherra ætti að vera nokkuð hólpinn í fárviðrinu enda bætt töluvert á sig. Hann er hins vegar afskaplega veðurhræddur sem var ekki ábætandi ofan á loftslagskvíðann. Hann liggur því í hnipri aftast í rútunni og neitar að hitta nokkurn mann. Aðrir taka vindinn í fangið og sofa síðan á fundum“.
Brynjar upplýsir svo að Diljá Mist Eimarsdóttir og Guðlaugur Þór leggi til að næsta ferðalag flokksins verði á Tenerife. Þar sé betra veður og auk þess meiri líkur á að rekast á kjósendur …
Athugasemdir