Norskt fréttatímarit birti afsökunarbeiðni til Samherja vegna umfjöllunar sem birtist í blaðinu í febrúar. Áfellisdómur yfir blaðamanninum Lasse Skytt. Páll Vilhjálmsson spyr hvort Blaðamannafélag Íslands ætli að biðjast afsökunar en á press.is birtist umfjöllun um grein eftir Skytt þar sem Samherjamálið var meðal annars rætt.
Í marsútgáfu norska fréttatímaritsins Aftenposten Innsikt, birtist afsökunarbeiðni blaðsins vegna greinar sem birtist þar í febrúar. Greinin fjallaði um spillingu á Íslandi og var skrifað af sjálfstætt starfandi blaðamanninum Lasse Skytt. Mbl segir frá málinu en þar beðist afsökunar á ýmsum vanköntum í greininni og vegna þess að Samherja var ekki gefinn kostur á að svara þeim ásökunum sem fram komu í greininni.
Páll Vilhjálmsson, framhaldsskólakennari og Moggabloggari spyr í nýrri bloggfærslu hvort Blaðamannafélag Íslands ætli að biðjast afsökunar. Á hverju gætu einhverjir velt fyrir sér en ástæðan er sú að á vefsíðu félagsins, press.is birtist umfjöllun í febrúar um grein eftir Lasse Skytt úr danska blaðinu Journalisten en þar er farið yfir ástæðurnar fyrir því að Ísland datt af toppi fjölmiðlafrelsislista Blaðamanna án landamæra. Í greininni er meðal annars rætt við Sigríði Dögg Auðunsdóttur, formann Blaðamannafélags Íslands og Þórð Snæ Júlíussonar, annars tveggja ritstjóra Heimildarinnar en Þórður og Arnar Þór Ingólfsson blaðamaður standa nú í málaferlum við Pál Vilhjálmsson vegna meintra meiðyrða.
Páll segir í færslu sinni að Þórður Snær hafi sagt eftirfarandi orð (og þannig „skáldað“) í grein Journalisten sem svo BÍ fjallaði um á vef sínum: Hann [Þórður Snær} og þrír aðrir blaðamenn fengu skyndiheimsókn í Reykjavík frá hópi lögreglumanna. Þeim var ekið til Akureyrar, sjávarbyggðar á Norðurlandi þar sem Samherji er með höfuðstöðvar.
Þetta er hins vegar ekki rétt. Í lauslegri þýðingu segir í Journalisten: Hann og þrír aðrir blaðamenn fengu skyndiheimsókn í Reykjavík frá hópi lögreglumanna. Þeir höfðu keyrt til höfuðborgarinnar frá Akureyri í norðri – fiskibæjar þar sem Samherji er með höfuðstöðvar.
Þá bendir Páll á að í grein Blaðamannafélagsins standi: Samherjamálið er rifjað upp, og sú ákvörðun lögreglustjórans á Norðurlandi eystra að hefja sakamálarannsókn gegn fjórum blaðamönnum í tengslum við fréttaflutning af einum anga Samherjamálsins.
Segir framhaldsskólakennarinn að þetta sé akkurat eitt af því sem Aftenposten Innsikt hafi beðist afsökunar á: Yfirheyrsla íslenskra blaðamanna hjá lögreglunni á Norðurlandi eystra hafi „ekki tengst umfjöllun þessara blaðamanna um umrætt mál [þ.e. Namibíumálið] og kemur þannig málinu ekki við“.
Bætir hann svo við: „Nú þegar fagmenn sem kunna blaðamennsku, ritstjórn Innsikt/Aftenposten, hafa beðist afsökunar ætlar Blaðamannafélag Íslands ekki að gera það sama?“
Mannlíf heyrði í Sigríði Dögg Auðunsdóttur og spurði hana hvort henni fyndist Blaðamannafélagið þurfa að biðjast afsökunar á að fjalla um grein Skytt í Journalisten eftir að Aftenposten Innsikt baðst afsökunar á skrifum Lasse Skytt í þeirra blað um sama mál. Sigríður hafði ekki heyrt af þessu en eftir að hafa kynnt sér málið benti hún á að um tvær mismunandi greinar væru að ræða. Því hafi BÍ ekkert til að biðjast afsökunar á.
Athugasemdir