Kona sem slasaðist leitaði til lögmanns sem hafði af henni stóran hluta bótanna. Tryggingafélagið greiddi rúmar 9,6 milljónir króna í bætur en lögmaðurinn hélt eftir rúmum þremur milljónum króna. Úrskurðarnefnd lögmanna kvað upp þann úrskurð 14. mars sl. að Ómari R. Valdimarssyni lögmanni bæri að endurgreiða konunni 1.859.801 krónur að meðtöldum virðisaukaskatti að frádregnum innborgunum vegna vinnu sinnar við innheimtu slysabóta.
Tryggingafélagið greiddi 9.614.642 kr. í bætur ásamt vöxtum og innheimtuþóknun lögmanns með virðisaukaskatti að fjárhæð 715.874.
Samkvæmt uppgjöri milli Ómars og konunnar var lögmannsþóknun að fjárhæð 3.112.581 kr. með vsk. sem sundurliðast þannig að 715.874 kr. komu frá tryggingafélaginu og 2.354.669 kr. voru dregnar frá bótum slösuðu konunnar.
Konan var ósátt við uppgjörið og sendi í kjölfarið erindi til Úrskurðarnefndar lögmanna og krafðist lækkunar á þóknuninni. Vísað var til þess að almennt væri krafist 50-75 prósent álag ofan á innheimtuþóknun sem greidd er af tryggingafélagi. Samkvæmt því hefði þóknun í málinu átt að vera á bilinu 1-1,2 milljón. Hins vegar hafi heildarþóknun lögmannsins numið 3.112.581 kr. sem sé um 148 prósent hærri þóknun en rótgróin venja sé um í málum sem þessum.
Úrskurðarnefndin komst að þeirri niðurstöðu að þóknun sem Ómar áskildi sér hafi ekki verið hæfileg miðað við umfang og sætti endurgjaldið lækkun að fjárhæð 1.252.780 krónur.
Mannlíf hafði samband við Ómar símleiðis.
„Já, sæl,“ sagði hann og sleit símtalinu áður en færi gafst að bera upp spurningar.
Athugasemdir