Sigmar Vilhjálmsson, athafnamaður og álitsgjafi, hefur átt erfiða tíma undanfarið. Á honum hafa dunið gjaldþrot og persónubundin áföll sem hann reynir að leysa sem best úr.
Simmi er alla jafna glaðbeittur og leysir gjarnan mál af bjartsýni og dugnaði. Það vakti þjóðarathygli þegar hann tilkynnti um breyttan lífsstíl og að hann ætlaði að leggja bílnum sínum og hjóla. Þetta þótti til fyrirmyndar þar til upp komst að hann hafði verið tekinn drukkinn undir stýri eftir að hafa drukkið bjór úr litlum dósum, eins og hann afsakaði sig með. Hann viðurkenndi síðan brotið opinberlega og hélt áfram að hjóla. Í framhaldinu tilkynnti Simmi að hann ætlaði að verða vegan í viku. Þar var væntanlega um að ræða grín af dýpri gerðinni.
Nú glímir hann við gjaldþrot. Félagið Sjarmur og garmur ehf., sem var í eigu hans og Subway-konungsins, Skúla Gunnars Sigfússonar, hefur verið úrskurðað gjaldþrota. Þeir félagar áttu langa og farsæla samleið í viðskiptum þar til upp úr sauð og vinslit blöstu við. Óljóst er hvernig viðskiptaveldi hans stendur að öðru leyti en víst talið að Sigmar muni rísa aftur úr öskunni líkt og fuglinn Fönix …
Athugasemdir