Maður nokkur var til ófriðs þar sem lögregla var að sinna máli í miðborginni. Hann neitaði að segja til nafns og gat ekki framvísað skilríkjum. Þetta varð til þess að hann var handtekinn og fluttur á lögreglustöð. Þá rofaði til í höfði hans og hann gaf upp kennitölu. Maðurinn var látinn laus eftir að hann hafði hert grein fyrir sér. Hann er þó ekki laus mála því nú verður hann kærður fyrir að gera ekki grein fyrir sér og situr í súpunni.
Brotist var inn á heimili í borginni og raftækjum og fleiru stolið. Málið er í rannsókn.
Ölvuð kona var klöguð til lögreglu eftir að hafa valdið ófriði. Hún gerði víðreist og var aftur klöguð vegna drykkjuláta sinna. Lögreglan greip inn í og kom á ró í kringum konuna sem nú sefur út sér vímuna og tryllinginn.
Ökumaður var handtekinn vegna gruns um akstur undir áhrifum fíkniefna og lyfja. Víðar um höfuðborgarsvæðið voru drukknir og dópaðir ökumenn á ferðinni og voru gómaðir af lögreglu og látnir sæta ábyrgð.
Annar var stöðvaður þar sem í ljós kom að hann var með útrunnin ökuréttindi og á ótryggðum bíl.
Útlendingur var handtekinn og vistaður í fangaklefa vegna rannsóknar á ólöglegri dvöl á Schengen-svæðinu. Hann var látinn laus eftir skýrslutöku. Skemmdir voru unnar á fjölbýlishúsi. Meðal annars var rúða brotin.
Athugasemdir