Egill Helgason sjónvarpsþáttastjórnandi og íbúi í miðbæ Reykjavíkur gagnrýnir hátíðardagskrá borgarinnar. Hann segir í færslu á Facebook:
„Ég tek ekki 17. júní í Reykjavík í sátt fyrr en aftur verður dansað á götum bæjarins um kvöldið.“
Í færslunni deilir hann hlekk að hátíðardagskrá Reykjavíkurborgar. Þar má sjá að formlegri dagskrá lýkur klukkan 17.00 og ekki virðist sem nein kvölddagskrá verði í boði.
Í athugasemd undir færslunni birtir hann til hliðarsjónar gulnaða dagskrá frá hátíðarhöldunum 1971. Á henni gefur að líta að dansað verði frá klukkan hálf tíu fram að slitum hátíðar klukkan tvö að næturlagi.
Margir fylgjendur Egils eru honum sammála á meðan aðrir benda á að ekki hafi fylgt þessu sérstakur sómi. Því svarar Egill:
„Það var endalaust hneykslast á þessu, man ég. En var krakki bænum að kvöldi 17. júní og man hvað það var dæmalaust hátíðlegt og skemmtilegt. Nú hefur menningarnótt tekið við – og ekki vantar fyllleríið þar. En í seinni tíð var sautjándinn alveg hættur að vera fyllerísdagur.“
Lausnamiðaðir benda Agli á kvölddagskrá Hafnarfjarðarbæjar en þar munu meðal annars Svala Björgvins og Páll Óskar stíga á stokk um kvöldið og skemmta.
Athugasemdir