Frosti Logason fullyrðir að áfrýjunarréttur Eddu Falak sé útrunninn án áfrýjunar hennar. Edda safnaði fyrir réttarhöldum í gegnum Karolina Fund-söfnunarsíðuna.
Frosti Logason birti rétt í þessu bút úr hlaðvarpsþætti sínum, Harmageddon þar sem hann ber Eddu Falak, fyrrum blaðakonu og hlaðvarpsstjórnanda, hörðum sökum. Segir Frosti að áfrýjunarréttur hennar í meiðyrðamáli gegn henni sé liðinn en hún hafði safnað fyrir honum með styrkjum frá fólki inni á Karolina Fund-söfnunarsíðunni.
Edda Falak tapaði meiðyrðamáli en móðir viðmælanda hennar í hlaðvarpsþættinum Eigin Konur, kærði hana fyrir að spila upptöku í þættinum, af meintu andlegu ofbeldi móðurinnar gagnvart dóttur sínni, sem var í viðtali hjá Eddu en dóttirin hafði tekið þetta upp þó nokkrum árum áður. Var Eddu gert að greiða 400.000 krónur í miskabætur auk málskostnaðar. Ákvað hún þá að áfrýja málinu til Landsréttar og hóf söfnun fyrir lögfræðikostnaðinum í kjölfarið. Upprunalega setti hún markið á 1,5 milljón króna en þegar því markmiði var náð ákvað Edda að hækka markið upp í 2,5 milljónir króna, til að standa straum að lögfræðikostnaðinum sem fylgdi áfrýjuninni.
Í nýju broti úr hlaðvarpsþætti Frosta, Harmageddon, fer hann yfir mál Eddu og söfnun hennar á Karolina Fund. Þegar hann hefur gert það, kemur alvarleg fullyrðing frá Frosta:
„Staðreyndir er sú að áfrýjunarfresturinn er liðinn og málinu hefur ekki verið áfrýjað en ég reyndar veit það að Edda sá sóma sinn í að greiða miskabæturnar, 400.000 þúsund krónurnar til móðurinnar og lögmanninum. Hún hefur sem sagt efnt dóm héraðsdóms og hefur þannig afsalað sér rétt til áfrýjunar til Landsréttar. Sem að þýðir að tveggja og hálfs milljón króna söfnunin hefur gjörsamlega verið svikin. Hún vissulega sá sóma sinn í greiða það sem hún var dæmd í héraðsdómi en það hefði hún náttúrulega átt að greiða úr eigin vasa, þetta er hennar lögbrot og hún var ekki að biðja fólk að safna fyrir því sem hún var búin að skíta upp á bak með. Hún var að biðja fólk að safna pening því að stelpan vildi áfrýja til Landsréttar.“
Frosti biður svo fólk að gefa Eddu gott klapp fyrir að hafa greitt miskabæturnar og bætir við: „Enda veit hún að það eru aðrar og fleiri kröfur sem hanga yfir hausnum á henni og kannski ekki gott að komast út úr svona kröfum sem héraðsdómur er búinn að dæma þig til að greiða.“ Segir hann að tvær og hálf milljón sem hún hafi safnað í gegnum Karolina Fund sé töluvert meira en það sem hún þurfti að borga í miskabætur og til lögmannsins en hann segist ekki vita hvað Edda hafi gert við restina: „Hvað ætli hún hafi gert við restina af peningnum? Ja, við vitum það auðvitað ekki en hún er allavega búin að vera mikið í útlandaferðum,“ segir Frosti og birtir skjáskot af Instagram-síðu Eddu þar sem hún hefur birt myndir úr ferðalögum sínum undanfarið. Frosti les svo upp texta sem Edda skrifaði við eina ferðamyndina en þar stóð „Hef ekki fengið kvíðakast síðan ég lenti“. Frosti: „En málið er að siðblindir narsissistar fá ekki kvíðaköst, siðblindir narsissistar eru samviskulausir en ef ég væri venjuleg manneskja myndi ég örugglega vera í kvíðakasti yfir því að ég væri búin að láta safna fyrir mig 2,5 milljónum og svíkja það. Að ljúga, svíkja og stela veldur kvíða.“
Í lok klippunnar segist Frosti vita að enn finnist fólk sem telji Eddu vera mikla baráttukonu: „Ég veit að það ennþá fólk þarna úti sem heldur og vill trúa því að Edda Falak hafi hreinlega bara verið í réttlætisbaráttu og er mjög réttsýn manneskja en það hefur kannski ekki heyrt allar sögurnar og staðreyndir málsins um það hvernig manneskjan vann og hvernig hún var að notfæra stöðu sína til að græða peninga og lifa í sviðsljós frægðar og frama.“
Ekki náðist í Eddu Falak við gerð fréttarinnar, þrátt fyrir ítrekaðar tilraunir.
Brotið má sjá hér að neðan:
Athugasemdir