Ósætti um nafnabreytingu Rúmfatalagersins: „Ein­angruð dæmi skipta í raun engu máli“

Rúm­fatalager­inn skiptir um nafn í sept­em­ber og mun heita JYSK.

Eitt ást­sælasta fyr­ir­tæki lands­ins mun skipta um nafn í lok sept­em­ber en þá mun fyr­ir­tækið sem nú heitir Rúm­fatalager­inn skipta um nafn. Nýja nafnið verður JYSK en er það upp­runa­lega nafn fyr­ir­tæk­is­ins sem stofnað var í Danmörku árið 1979 en Rúm­fatalager­inn hóf starf­semi á Íslandi árið 1987. Ekki er allir sáttir með fyr­ir­hug­aða nafna­breyt­ingu.

Ei­ríkur Rögn­valds­son, pró­fessor emi­ritus í ís­lenskri mál­fræði er einn af þeim. „Eitt og eitt heiti skiptir ekki máli þannig séð, en maður verður að horfa á þetta í sam­hengi og hvað svona nafn­breyt­ing sýnir um hug­myndir okkar um ís­lensku og út­lensku. Af hverju erum við alltaf að forð­ast ís­lensk­una?“ spyr Eiríkur í við­tali við Vísi.

„Svona ein­angruð dæmi skipta í raun engu máli. Það skiptir engu máli þó að ein­hver vara eins og Toppur eða eitt­hvert fyrir­tæki eins og Rúm­fata­lag­er­inn breyti um nafn. Það sem ég hef miklu meiri á­hyggjur af er í raun og veru það sem liggur að baki. Þetta við­horf, eða hug­mynd eða trú að er­lend heiti séu á ein­hvern hátt heppi­legri og að ís­lensk heiti séu, að því er virð­ist, hall­æris­leg,“ sagði Eiríkur um málið.

„Ég hef miklu meiri á­hyggjur af sjúk­dómnum sjálfum heldur en sjúk­dóms­ein­kenn­unum. Þetta bara ber vott um þetta hugar­far, sem er ó­heppi­legt, að er­lend heiti virki á ein­hvern hátt betur heldur en ís­lensk.“