Steinunn Ólína Þorsteinsdóttir fer mikinn í nýlegri færslu á Facebook en þar sem hún hjólar í kollegana Katrínu Jakobsdóttur og Guðrúnu Hafsteinsdóttur vegna nýju útlendingalaganna.
Í byrjun hinnar harðorðu færslu segir leikkonan að ástin sigri allt og að „kærleikurinn fellur aldrei úr gildi“. Því næst talar hún um það sem Katrín Jakobsdóttir kallar „brottfararbúðir“ en flestir aðrir kalla fangabúðir, fyrir þá hælisleitendur sem hafa misst allan styrk frá yfirvöldum hér á landi en hafa ekki efni á að komast frá landinu. „Brottfararbúðir. Öllum nöfnum má nú kalla hlutina, en við skulum staldra við orðaval forsætisráðherra. Brottafararbúðir. Og hugsa. Hverjum dettur svona þvælusalad í hug? Forsætisráðherra sjálfri? PR teymi ráðuneytissins. Eru allir gengnir af göflunum?“ skrifaði Steinunn Ólína og heldur áfram: „Dómsmálaráðherra Guðrún Hafsteinsdóttir bætir um betur og nefnir það búsetuúrræði með takmörkunum og þá erum við ekki að tala um, gluggaleysi eða skerta salernisaðstoðu, heldur útskýrir Dómsmálaráðherra að takmarkanirnar snúist um aðgang. Aðgangsskert búsetuúrræði þar sem fólk er ekki frjálst ferða sinna, samkvæmt orðanna hljóðan, en Dómsmálaráðherra þvertekur samt fyrir að slík úrræði séu flóttamannabúðir. Heyriði falskt fiðlusurgið?“
Segir Steinunn að heiðarlegra hefði það verið af þeim stöllum ef þær hefður svarað fréttamanni RÚV á eftirfarandi máta: „Við erum hjartalausir róbótar sem erum að keyra handónýtt forrit enda erum við ekki lengur manneskjur og skiljum ekki afleiðingar gjörða okkar.“ Heldur hún áfram og biður fólk að staldra við orðaval dómsmálaráðherrans, sem kallaði væntanlegar flóttamannabúðir „búsetuúrræði með takmörkunum“: „Íverustaður þar sem fólk er ekki frjálst ferða sinna þýðir einfaldlega, að fólk er frelsissvipt og fangelsað. Og flóttafólki sem komið er fyrir í slíkum úrræðum ER frelsissvipt og fangelsað. Þetta ERU fangabúðir. Þar eru verðir sem gæta ferða þinna.“
Þá segir Steinunn að fólk sé aldrei ólöglegt. „Aldrei. Hvergi. Að vera til og búa einhverstaðar er réttur hvers manns.“ Biður leikkonan svo lesendur að leggja andlit Guðrúnar og Katrínar á minnið sem og framkomu þeirra og talsmáta, „sem víti til varnaðar.“ Og hún spyr: „Hvar er maður staddur í veröldinni þegar maður kemur svona fram við aðra? Þegar maður þvaðrar tóma vitleysu með hræðilegum afleiðingum fyrir bræður sínar og systur?“
Steinunn er hvergi nærri hætt en hún segir að flest okkar kannist við að hafa einhvern tíma talið sig yfir aðra hafin en að fæst okkar hafi völd svo „baneitrað ruglið eitrar bara fyrir okkur sjálfum og smækkar og étur okkur að innan.“ Í kjölfarið segir hún: „Katrín og Guðrún eru ljósmyndir af angistinni. Sársaukanum hið innra. Því ef maður kemur svona illa fram við aðra er maður vesælli en allt sem vesælt er. Við skulum vorkenna þeim en ekki hata þær. Þær eiga bágt. Mjög bágt. Við skulum biðja trúaða að biðja fyrir þeim. Hugsa fallega til þeirra. Þetta eru valdakonur og eru ekki bara að nöldra við kaffivélina í fáfræði og hroka. Þessar konur víla ekki fyrir sér að níðast á öðrum, fangelsa fólk og frelsissvipta, fyrir það eitt að vilja ekki fara héðan.“
Færsluna má sjá hér að neðan en hún hefur vakið gríðarleg viðbrögð.
Athugasemdir