Mikið var um ölvunarakstur í nótt samkvæmt dagbók lögreglunnar á höfuðborgarsvæðinu. Þá voru tveir skemmtistaðir ávíttir fyrir að leyfa fólki undir áfengisaldri að vera inni á stöðunum.
Aðili var til ama og óþurftar í og við fyrirtæki í miðbæ Reykjavíkur. Var honum gefið tækifæri á að láta af hegðun sinni en hann lét sér ekki segjast. Var hann því hantekinn en reyndist hann þá vera með fíkniefni á sér. Var aðilinn vistaður í fangaklefa.
Tilkynning barst um spyrnu og bifreiðahitting, líkt og sjá má í unglingamyndum níunda áratugarins, nú eða í Fast and the Furious myndunum. Þegar lögreglu bar að garði var ekkert í gangi.
Við vínhúsaeftirlit reyndist einn skemmtistaður hafa fjóra dyraverði án tilskilinna réttinda. Einnig fundust ungmenni undir tvítugu inni á staðnum. Rætt við ábyrgðarmann rekstrar og honum kynnt að lögregluskýrsla yrði rituð um málið.
Þá var tilkynnt um slagsmál fyrir utan bar. Var búið að leysa málið þegar lögreglan mætti á vettvanginn. Á sama stað voru þrjú ungmenni undir 18 ára aldri. Skýrsla var rituð um þann hluta málsins.
Tilkynning barst um aðila sem svaf ölvunarsvefni á hóteli við brotna rúðu. Eftir að aðilinn gaf lögreglu upplýsingar var honum sleppt.
Líkamsárás var tilkynnt í miðbænum og hafði lögreglan uppi á gerendunum þar sem einn hljóp frá lögreglu. Voru þeir teknir höndum og fluttir á lögreglustöðina á Hverfisgötu þar sem einn var vistaður í klefa en tveimur sleppt að lokinni upplýsingatöku.
Þá voru lögreglumenn stöðvaðir af borgurum við eftirlit þar sem þeir tilkynntu líkamsárás. Árásaraðilinn var hantekinn og vistaður í klefa. Málið er nú rannsakað.
Úr Kópavoginum barst tilkynning um átök þar sem hugsanlega væri aðili með vopn á vettvangi. Árásaraðilarnir voru farnir er lögreglan mætti á vettvang en fundust þeir stuttu síðar. Voru þeir vistaðir í fangaklefa vegna málsins, sem nú er rannsakað.
Lögreglan á öllum stöðvum stöðvuðu á einhverjum tímapunkti ökumenn sem reyndust undir áhrifum áfengis eða fíkniefna. Þá voru nokkrir ökumenn án réttinda.
Athugasemdir