Helga Vala Helgadóttir tekur upp hanskann fyrir Rúnu Mjöll Helgadóttur í nýrri færslu á Facebook.
Helga Vala Helgadóttir, lögmaður og fráfarandi þingkona Samfylkingarinnar skrifaði færslu á Facebook í dag þar sem hún tekur upp hanskann fyrir Rúnu Mjöll Helgadóttur sem sýndi Hannesi Hólmsteini Gissurarsyni hvar Davíð keypti ölið í gær eftir að hann hafði haldið því fram á Facebook að múslímsk kona hafi reynt að ræna tösku af honum á Leifsstöð en hann kom frá Portúgal í nótt. Rúna Mjöll, sem starfar á Leifsstöð og varð vitni að öllu saman, leiðrétti prófessorinn og sagði frá því hvernig Hannes öskraði á barnungar systur með hatursorðræðu. Hannes svaraði svo Rúnu og sagði hana brjóta trúnað með sannleikanum.
Í færslu Helgu Völu segir hún það rangt hjá Hannesi að Rúna sé bundin trúnaði gagnvart því sem gerist á almannarými í Leifsstöð. Kallar hún Hannes „valdsmann“ í færslunni enda hefur hann verið innmúraður í Sjálfstæðisflokknum um áratuga skeið. Færsluna má lesa hér að neðan:
„Nú hjólar valdsmaðurinn í unga starfskonu fyrir að leiðrétta rangfærslur hans um hvað raunverulega gerðist í komusal í Leifsstöð þar sem hann virðist hafa misst stjórn á sér gagnvart tveimur börnum og móður þeirra. Við skulum átta okkur á því að starfskonan er ekki bundin trúnaði um það sem gerist í því almannarými sem þarna er. Við skulum líka átta okkur á að valdsmaðurinn, sem tengist stjórnarformanni vinnuveitanda hennar tryggðarböndum eftir ártuga trúmennsku við hann og flokk hans, er með orðum sínum um trúnaðarbrest í starfi að hóta ungu starfskonunni. Ef einhver sem þetta les þekkir hana þá vil ég biðja ykkur um að verja hana og segja henni að einmitt svona hegði valdsmenn sér stundum. Sér í lagi ef þeir hafa staðið með valdinu lengi. Ég og mitt fólk þekkjum þetta vel og höfum oft orðið fyrir hótunum sambærilegum og valdsmaðurinn beitir nú.“
Athugasemdir