Sverrir Einar Eiríksson segist vera ósáttur með vinnubrögð lögreglu.
Sverrir Einar Eiríksson, einn eiganda skemmtistaðarins B, er ekki sáttur með framgang lögreglu um helgina en staðnum var tímabundið lokað og Sverrir handtekinn í kjölfarið. Vísir greindi frá því að staðnum hafi verið lokað vegna þess að of margir gestir væru inn á staðnum og einhverjir þeirra undir lögaldri. Sverrir hefur ákveðið að senda inn formlega kvörtun vegna málsins.
Sverrir hefur sent frá sér yfirlýsingu vegna málsins sem hægt er að lesa hér fyrir neðan
„Á aðfararnótt 17. september sl. kom upp ágreiningur um vinnubrögð lögreglu við eftirlit á veitingastað okkar í Bankastræti. Okkur aðstandendum staðarins fannst vanta að gætt væri hófs í vinnu lögreglu, en áður hafði þurft að leiðrétta misskilning lögreglumanns sem eftirlitið leiddi um kröfur þær sem gerðar eru til dyravarða á staðnum. Sami lögreglumaður lét færa undirritaðan niður á lögreglustöð þar sem málinu lauk og mér var sleppt.
Lögreglan heldur því fram að of margir hafi verið inni á staðnum, en talning með aðstoð öryggismyndavélakerfis staðarins sýnir að svo var ekki.
Ég hef sent lögreglustjóranum á höfuðborgarsvæðinu formlega kvörtun vegna framgöngu þessa lögreglumanns. Okkur er í mun að gott samstarf sé við lögreglu og hörmum að þarna hafi orðið misbrestur á því. Við vinnum að því að koma á samtali við lögregluna á höfuðborgarsvæðinu um vinnulag við eftirlit sem fullnægi þörfum lögreglu án þess að það sé um of íþyngjandi fyrir gesti og rekstur staðarins.“
Athugasemdir