Vísa á einstæðri móður með átta börn, þar af sex undir lögaldri, úr landi, þrátt fyrir að elsta dóttirin sé í geðrofi og tíu ára dóttir hennar sé flogaveik.
Samtökin Réttur barna á flótta birti ljósmyndir á Facebook af börnum sem stjórnvöld á Íslandi hyggjast vísa úr landi einstæðri móður frá Palestínu en fjölskyldan kom til Evrópu í gegnum Spán. Fjölskyldan er stór en börnin eru alls átta en þar af eru sex þeirra undir lögaldri. Sú elsta er andlega fötluð og er í geðrofi, samkvæmt Réttur barna á flótta og tíu ára dóttir konunnar þjáist af flogaveiki. Þá er ungur sonur konunnar að jafna sig eftir uppskurð sem hann fór í í lok ágúst.
Með ljósmyndunum sem samtökin birtu, er texti sem lýsir slæmri meðferð barnanna hér á landi. Þar kemur fram að þann 4. september hafi fjölskyldan verið flutt í Bæjarhraun 16, sem er á vegum Ríkislögreglustjóra. „Þar eru aðstæður sérstaklega slæmar fyrir börn og andleg staða barnanna hefur versnað verulega,“ segir í færslunni og einnig tekið fram að börnin sem eru á grunnskólaaldri, hafi ekki fengið að fara í skóla í þá tæpa níu mánuði sem þau hafa verið hér á landi. Í færslunni kemur fram að börn á flótta hafi sömu réttindi og önnur börn á Íslandi, „hvað varðar menntun, leik, heilbrigðisþjónustu en líka öryggi.“
Lokaorð færslunnar eru sterk: „Veik börn eru sérstaklega viðkvæm og við mótmælum brottvísun þeirra, slíkt felur í sér framlengingu á óvissu og óöryggi og endar oftar en ekki í heimilisleysi, ofbeldi og misnotkun á börnum.“
Athugasemdir