Arnar Luxor kominn með nýja vinnu: „Það eru alls kon­ar pæl­ing­ar á lofti“

Söng­fugl­inn Arnar Jónsson hefur ráðið sig í nýja vinnu.

Arnar Jónsson, stór­söngv­ari, hefur verið ráð­inn nýr aðstoð­ar­maður skipu­lags- og bygg­ing­ar­full­trúa í Rangár­þingi eystra og er greint er frá þessu á Hvols­vollur.is. Arnar er lík­lega þekkastur fyrir að vera með­limur í stráka­sveit­inni Luxor sem gerði garð­inn frægan á árunum 2007 til 2008 en voru þeir til­raun Einars Bárða­sonar, umboðs­manns, til að gera stráka­út­gáfu af Nylon. Þó að hljóm­sveitin sé ekki lengur starf­andi er Arnar sem ennþá á fullu við að syngja og er plata vænt­an­lega frá honum á næstu mán­uðum.

„Ég veit ekki al­veg hvenær við gef­um þetta út, það eru alls kon­ar pæl­ing­ar á lofti úti sem eru mjög spenn­andi. Ég er samt ekki al­veg með svör­in við þeim núna,“ sagði Arnar í sam­tali við mbl.is um plöt­una.

Arnar er með Bsc. gráðu í Vél- og orku­tækni­fræði frá HR og er einnig mennt­aður húsa­smiður. Síðast starf­aði Arnar sem verk­efna­stjóri á mann­virkja- og umhverf­is­sviði Árborgar. 

Arnar er giftur Hólm­fríði Ósk Sam­ú­els­dóttur og búa þau saman ásamt börnum þeirra tveimur á Hellu.