Egill Helgason segist eiga erfitt með að kalla Hamas, hryðjuverkasamtök.
Fjölmiðlamaðurinn Egill Helgason skrifaði færslu fyrir stundu þar sem hann talar um stríðið á milli Ísrael og Hamas-samtakanna. Segir hann að Ísraelar munir hefna sín grimmt á árás Hamas-liða og að lokum muni fleiri Palestínumenn liggja í valnum en Ísraelsmenn. Segist hann þó að mögulega muni þetta trufla „vinahót Saudi-Araba og ríkjanna við Persaflóa.“ Segir hann að þó að yfirstéttin í þeim ríkjum vilji helst gleyma Palestínumönnum, sé von um að almenningur sem og trúarleiðtogar bregðist illa við „þegar birtast myndir af grimmilegri hefnd Ísraela.“
Færslan í heild sinni er hér fyrir neðan:
„Eins og ætið þegar Ísrael/Palestína á í hlut upphefst mikið áróðurs- og túlkunarstríð. Það er náttúrlega tragedía að Gaza skuli vera undir yfirráðum hinna ógeðfelldu Hamas-samtaka á sama tíma og Vesturbakkinn lýtur stjórn gamalmennanna í Fatah. Meðan heldur hið ófyrirleitna landrán Ísraelsmanna áfram. Það er ekkert nema nýlendustefna upp á gamla mátann. Nýskeð kallaði fyrrverandi yfirmaður leyniþjónustunnar Mossad, Tamir Pardo, framferði Ísraela apartheid. Af þessum sökum finnst mér erfitt að kalla Hamas hryðjuverkasamtök. Það er lika spurning hvort hægt sé að kalla landránsfólk óbreytta borgara. En árásir Hamas koma nokkuð á óvart – og merkilegt að Ísraelsmenn hafi sofið á verðinum. Þessi uppreisn verður barin niður af miskunnarleysi og á endanum munu fleiri Palestínumenn bíða bana og hjóta örkuml en Ísraelsmenn. En kannski nær þetta að trufla aðeins vinahót mili Ísraelsmanna og Saudi-Araba og ríkjanna við Persaflóa þar sem núorðið er aðalvaldamiðstöðin í Arabaheiminum. Ljóst er að yfirstéttin þar kærir sig kollótta um Palesínumenn og vill helst gleyma þeim, en því gæti verið öðruvísi farið með almenning í olíuríkjunum og eins trúarleiðtoga. Það mun hafa áhrif þegar birtast myndir af grimmilegri hefnd Ísraela.“
Athugasemdir