„Lítið verið rætt um það, að minnsta kosti ekki út á við, hver áhrifin á jarðhitann verður ef og þegar kvikubráðin nær upp í jarðsjóinn. Svo ekki sé talað um við hverju megi búast nái kvikan til yfirborðs með gosi þar sem gnótt er af vatni í bergrunninum,“ ritar Einar Sveinbjörnsson veðurfræðingur, í færslu á samfélagsmiðlinum Facebook. Þar veltir hann fyrir sér um kvikuinnskotinu undir Svartsengi.
Einar telur líklegt að gos í Svartsengi verði með talsvert annarri birtingamynd en eldgosin þrjú sem hafa verið í Geldingadölum, þá helst í fyrsta fasa þess.
„Ekki er að finna jarðhita í Fagradals-eldstöðvakerfinu. Jarðsjórinn sem einkennandi er í berggrunni Reykjanesskagans nær ekki þar inn, a.m.k. ekki undir Fagradalsfjall,“ útskýrir Einar og bendir á að gosið í mars 2021 hafi verið flæðigos og því engar gufusprengingar né gjóskufall – sem eru afleiðingar þegar kvika kemst í snertingu við vatn.
„Lóðrétt kvikustreymi eða „kvikukoddinn“, sem nú mælist í næsta kerfi, það er Eldvörpum- Svartsengi mun væntanlega fyrr en síðar ná upp í jarðsjóinn sem vissulega er mjög heitur fyrir og líka grunnurinn að jarðhitavirkjuninni í Svartsengi,“ skrifar Einar.
Einar útskýrir því næst að vinnsluholur Svartsengis, sem er flestar á milli 400 og 1.900 metra djúpar, sýni að ofan á jarðsjónum liggi þunnt lag af ferskvatni, sem einnig er dælt upp.
Hér að neðan má sjá færslu Einars í heild:
Sjá tengdar fréttir:
Hætta á eldgosi í dag: „Ansi hræddur um að við séum komin nálægt því“
Athugasemdir