Hópur fólks á 20 bifreiðum freistaði þess í nótt að stöðva lögregluna í því að flytja Eddu Björk Arnardóttur á flugvöllinn í Keflavík þaðan sem átti að senda hana til Noregs þar sem hún á að mæta fyrir dóm í forsjármáli. Um er að ræða forræðisdeilu þar sem móðirin Edda hefur verið dæmd fyrir norskum dómstólum til að skila börnunum sínum til föðurs þeirra. Íslensk stjórnvöld hafa samþykkt framsal hennar.
Ragnheiður Arnardóttir, systir Eddu, var talsmaður hópsins. Hún sagði við fjölmiðla í nótt að hún teldi að ætlunin hefði verið að senda systur hennar úr landi í morgun klukkan 8. Sjálf sagðist hún tilbúin að láta handtaka sig fremur en að gefa eftir í mótmælastöðunni.
Nóttin var kyrrlát og leið á Hólmsheiði án þess að mótmælendur yrðu þess varir að Edda hefði verið flutt brott. Hafði hópurinn ætlað að tefja eða koma í veg fyrir að lögreglan gæti sótt Eddu í fangelsið og farið með hana út á flugvöll og til Noregs. Óljóst er því sem stendur með örlög Eddu.
Athugasemdir