Utanríkisráðherra Noregs með yfirlýsingu: „Við eigum ekki að beita milljónum manna hóprefsingu“

Utan­rík­is­ráð­herra Noregs segir að það ætti ekki að „beita millj­ónum manna hóprefs­ingu“ með því að hætta greiðslum til Flótta­manna­hjálpar Sam­ein­uðu þjóð­anna í Palest­ínu.

Espen Barth Eide, for­sæt­is­ráð­herra Noregs sendi frá sér yfir­lýs­ingu í gær þar sem hann útskýrir ákvörðun Noregs að halda áfram styrkjum sínum til Flótta­manna­hjálpar Sam­ein­uðu þjóð­anna í Palest­ínu (e. UNRWA), þrátt fyrir ásak­anir ísra­el­skra stjórn­valda á hendur 12 starfs­mönnum stofn­un­ar­innar en þeim er gert að hafa tekið þátt í árásum Hamas-liða í Ísrael 7. októ­ber síð­ast­lið­inn.

Í yfir­lýs­ing­unni segir Espen að ásak­anir Ísra­els­stjórnar á hendur starf­mönnum Flótta­manna­hjálp­ar­innar, vera grafal­var­legar og að það þurfi að rann­saka þær gaum­gæfi­lega. Þá segir hann Noreg hafa for­dæmt árás­irnar 7. októ­ber harka­lega og að þeir sem beri ábyrgð verði að vera sóttir til saka og að sleppa verði öllum gíslum Hamas undir eins.

„Ástandið á Gaza er hörmu­legt,“ skrifar Espen næst og heldur áfram. „80 pró­sent fólks­ins á Gaza er á ver­gangi en mörg þeirra hafa leitað skjóls í yfir­fullum skóla­bygg­ingum. Þúsundir borg­ara hafa verið drepnir, þar á meðal börn, meira en 150 starfs­menn UNRWA, sem og kenn­arar, læknar, blaða­menn og ótelj­andi fleiri aðilar sem hafa ekk­ert með stríðið að gera. Það er skortur á bæði mat og vatni og aðgengi að heil­brigð­is­þjón­ustu er afar ófull­nægj­andi. UNRWA er líf­lína fyrir tæp­lega 2 millj­ónir manna á Gaza.“

Espen segir einnig í yfir­lýs­ing­unni að Noregur sé stór styrkt­ar­að­ili til Flótta­manna­hjálp­ar­innar en að sumar þjóðir hafi nú fryst styrki sína til aðstoðar Palest­ínu­mönnum. „Noregur hefur ákveðið að halda áfram að styrkja sam­tökin. Þó að ég deili áhyggjum af mjög alvar­legum ásök­unum á hendur sumum starfs­mönnum UNRWA, hvet ég aðra styrk­veit­endur til að velta fyrir sér víð­tæk­ari afleið­ingum þess að skera niður fjár­fram­lög til UNRWA á þessum tímum mik­illa mann­úð­ar­krísu. Við eigum ekki að beita millj­ónum manna hóprefs­ingu.“

Að lokum segir Espen: „Við verðum að greina á milli þess sem ein­stak­lingar kunna að hafa gert og þess sem UNRWA stendur fyrir. UNRWA hefur 30.000 starfs­menn víðs vegar um Jórdaníu, Líbanon, Sýrland, Vest­ur­bakk­ann, þar á meðal Austur-Jer­úsalem og Gaza. 13.000 þeirra vinna á Gaza við að dreifa aðstoð, bjarga manns­lífum og tryggja nauð­syn­legar þarfir og rétt­indi íbúa. Íbúar Gaza þurfa á brýnni mann­úð­ar­að­stoð að halda og mega ekki gjalda fyrir gjörðir ann­arra.“