Matthías Johannessen, fyrrverandi ritstjóri Morgunblaðsins og skáld, lést á líknardeild Landspítalans í Kópavogi í gær, 94 ára að aldri. Matthías ritstýrði Morgunblaðinu frá 1959 til ársloka 2000, eða í 41 ár – lengur en nokkur annar. Morgunblaðið greindi frá andláti hans.
Matthías var fæddur 3. janúar 1930 og var sonur hjónanna Haraldar Johannessen aðalféhirðis Landsbankans og Önnu Jóhannesdóttur Johannessen, húsmóður.
Hann lauk stúdentsprófi frá Menntaskólanum í Reykjavík árið 1950 og kandídatsprófi í íslenskum fræðum, með bókmenntir sem aðalgrein, frá Háskóla Íslands.
Árið 1951 hóf Matthías störf, sem blaðamaður, hjá Morgunblaðinu samhliða námi, þá 21 árs að aldri.
29 ára gamall var hann ráðinn ritstjóri blaðsins. Þar tók hann við ritstjórastöðu við hlið Valtýs Stefánssonar, dr. Bjarna Benediktssonar og Sigurðar Bjarnasonar frá Vigur. Síðar starfaði hann með Eyjólfi Konráð Jónssyni og Styrmi Gunnarssyni.
„Matthías var ekki maður einhamur, en í honum bjuggu ritstjórinn og skáldið í sátt og samlyndi. Hann nýtti sér skáldgáfuna á síðum blaðsins, þar sem viðtöl hans við merkisfólk af öllum stigum nutu verðskuldaðra vinsælda. Hann leit á Morgunblaðið sem menningarstofnun ekki síður en útbreiddasta og greinarbesta fréttamiðil þjóðarinnar: blað allra landsmanna,“ segir í tilkynningu miðilsins.
Hann gegndi mörgum trúnaðarstörfum, ber þar helst að nefna í stjórn Hins íslenska bókmenntafélags, innan Sjálfstæðisflokksins, Stúdentaráðs HÍ og Blaðamannafélagsins.
Athugasemdir