„Harry Klein“ liggur á dánarbeðinum: „Hún höndlar aðstæðurnar ótrúlega vel“

Þýski leik­ar­inn Fritz Wepper, sem þekkt­astur er á Íslandi fyrir hlut­verk sitt sem Harry Klein í saka­mála­þátt­unum Derrick, liggur á dán­ar­beð­inum sínum á hjúkr­un­ar­heim­ili í Efri-Bæj­ara­landi. Þar er honum veitt líkn­andi með­ferð en hann er hættur að taka lyfin sín.

Fritz, (82) hefur verið á hjúkr­un­ar­heim­il­inu síð­ustu daga en eig­in­kona hans, Susanne Kell­er­mann, (49) og dóttir þeirra Filippa (12) hafa verið við hlið hans á þessum síð­ustu metrum hans, sam­kvæmt Bild.

„Hún höndlar aðstæð­urnar ótrú­lega vel,“ sagði Susanne um dóttur þeirra í sam­tali við Bild. „Hún er mjög umhyggju­söm, gleður hann, segir honum margt og skreytir her­bergið hans með myndum.“

Síðasti spölurinn

Fregnir af dán­ar­legu Fritz kemur Þjóð­verjum ekki á óvart en hinn marg­verð­laun­aði og vin­sæli leik­ari hefur und­an­farin ár átt við mikil veik­indi og per­sónu­leg áföll að stríða.

Í des­em­ber síð­ast­lið­inn var hann fluttur á sjúkra­hús með blóð­eitrun og fékk þá ein­ungis líkn­andi með­ferð, þannig að það var strax ljóst þá að nú væri komið að enda­sprett­inum. Fritz fékk einnig blóð­eitrun fyrir tíu árum síðan og var þá hepp­inn að lifa af. Árið 2021 fékk leik­ar­inn góð­kunni húð­krabba­mein og var æxlið fjar­lægt. Í fyrra lést svo bróðir hans, leik­ar­inn Elmar, óvænt, 79 ára að aldri en þeir voru nánir.

Þrátt fyrir að Fritz sé kom­inn á enda­stöð er hann ánægður að fá heim­sóknir og er í góðu formi and­lega, sam­kvæmt þýskum fjöl­miðlum.