Hlunkur í nýrri mynd.
Breytingar hafa verið gerðir á Hlunki, einum vinsælasta íspinna Íslands, og er hann kominn með breytt útlit en breytingarnar hafa það í för með sér að hann hefur minnkað um 10 millilítra en hann var áður 100 millilítrar.
„Hlunkurinn verður 90 millilítrar en aðalbreytingin er í forminu á honum,“ segir Elías Þór Þorvarðarson, sölu- og markaðsstjóri Kjörís, um breytinguna. „En vissulega leggur hann örlítið af eins og við greinum frá. Uppskrift er sú sama og áður. Formin sem við höfum verið að nota eru gömul og ekki aðgengileg lengur en þessi nýju er eins lík því gamla og við gátum fundið. Hlunkarnir fara reyndar allir vel yfir 90 millilítra í dag en þorðum ekki að lofa honum stærri í þessu móti og vildum frekar að hann færi upp fyrir uppgefin mörk en niður fyrir þau.“
Á sama tíma greindi Kjörís frá því að breytingar yrðu á pinnalínu fyrirtækisins þar sem ísum yrði fækkað úr tíu í átta í hverjum kassa. Mannlíf spurði Elías hvort þetta hefði áhrif á verðlag á kössunum.
„Í þessum breytingum á flaugum fer fjöldi flauga úr 10 stykki pakkningum i 8 stykki. Þá lækkar eðlilega heildarverð pakkningar frá okkur. Enda færri pinnar á bak við hana. En ef þú deilir kostnaði niður á pinna þá hækkar hver pinni aðeins hjá okkur samhliða, ca. 8-9%. Það verður óhjákvæmilega ákveðið óhagræði við pökkun í minni pakkningar þar sem ytri umbúðir eru nú bornar uppi af færri pinnum sem eykur kostnað við hvern pinna.“
Aðeins tíminn mun leiða í ljós hvort að neytendur taka nýjan Hlunk í sátt en Kjörís hefur mátt þola mikla andstöðu undanfarnar vikur vegna tengsla sinna við Guðrúnu Hafsteinsdóttur dómsmálaráðherra.
Athugasemdir