Sumarið 2005 áttust við landslið Íslands og Svíþjóðar í knattspyrnu kvenna og náði Ísland jafntefli við sterkt lið Svíþjóðar og þóttu úrslitin góð fyrir land og þjóð. Þóra Björg Helgadóttir, markmaður Íslands, átti stórleik og var valin maður leiksins og fékk hún ryksugu að launum.
„Það yrði allt brjálað hérlendis ef Eggert Magnússon myndi afhenda leikmanni leiksins ryksugu. Ég hélt að Svíar væru svo miklir jafnréttispostular en svo virðist ekki vera,“ sagði Björn Ingi Hrafnsson, þáverandi aðstoðarmaður forsætisráðherra, sem var allt annað en sáttur framkomu Svía árið 2005. „Systurnar Ásthildur og Þóra Helgadætur áttu stórleik og Þóra útnefnd maður leiksins að honum loknum. Og verðlaunin: – Jú, ryksuga að gjöf! Það voru fín skilaboð inn í jafnréttisbaráttuna. Já, ég er móðgaður fyrir hönd kvenna. Mér finnst þetta ákaflega gamaldags kynjamyndir sem birtast í þessu. Ég veit ekki hvort karlmenn fá borvél í verðlaun fyrir eitthvað svipað né hvort einhverjum snillingnum hefur fundist þetta gífurlega fyndið. En það er þá langsóttur brandari.“
Þóra tók þó málinu ekki alvarlega sjálf. „Mér var afhent þetta af starfsmanni vallarins. Ég er nú ekki búin að taka hana upp úr kassanum en hún verður prófuð innan skamms. Mig vantaði einmitt ryksugu. Já, já, maður tekur þessu bara sem brandara. Enda efast ég um að einhver mismunun búi þarna að baki,“ sagði Þóra við blaðamann DV um málið og sagði að ryksugan væri af gerðinni Volta. „Örugglega fín ryksuga.“
Athugasemdir