Nýlegt æði, sem er illskiljanlegt fyrir fullorðna, hefur smitast milli barna í Bandaríkjunum síðustu mánuði og dreifst yfir til Íslands í gegnum samfélagsmiðla.
Æðið gengur út á að kalla 6-7, eða six-seven, af minnsta tilefni, þegar blaðsíða 67 er opnuð, þegar 6–7 mínútur eru í hádegismat eða bara af engu sérstöku.
„Ekki síðan 69 hefur tala valdið svona mikilli truflun,“ segir CNN í umfjöllun um fyrirbærið.
„Þetta er eins og plága — veira sem hefur tekið yfir huga krakkanna,“ segir Gabe Dannenbring, náttúrufræðikennari í 7. bekk í Sioux Falls í Suður-Dakóta í viðtali við CNN. „Þú getur ekki sagt neina útgáfu af tölunum 6 eða 7 án þess að minnst 15 krakkar öskri: ‘6–7!’“ segir hann og bætir við að hann hafi heyrt það 75 sinnum á einum skóladegi.
Sérfræðingar sem CNN ræddi við segja að „6–7“ merki í sjálfu sér ekkert – en nái samt að skapa tilfinningu fyrir „aðild“ og samstöðu meðal barna.
„Þetta verður að tungumálaleik fyrir þau sem, virðist vera, aðeins fólkið í hópnum þeirra kann að spila með,“ segir Gail Fairhurst, prófessor í samskiptum við Háskólann í Cincinnati. Taylor Jones, málfræðingur og félagsvísindamaður, segir að vinsældirnar endurspegli „merkingarþynningu“, þegar orð eða orðasamband losnar frá uppruna sínum.
Uppruninn er óljós, en talan birtist í viðlagi lagsins „Doot Doot (6 7)“ eftir rapparann Skrilla og tengdist síðar handahreyfingu á TikTok sem körfuboltaleikmaðurinn Taylen Kinney kom á koppinn. Síðan hefur hún ratað í íþróttamyndbönd og menningarlíf á netinu. „Enginn veit hvað þetta þýðir,“ segir Dannenbring. „Og það er einmitt fyndna við þetta.“
Hér er eitt þeirra myndbanda sem dreifði 6-7.
Kennarar hafa svarað með ýmsu móti. Sumir banna kallið í stofunni, aðrir beita því gegn nemendum með því að nota það sjálfir eða jafnvel að syngja það í upphitun. Fairhurst segir að þegar fullorðnir taki slangrið upp „deyji“ það gjarnan. Jones tekur í sama streng: „Auðveldasta leiðin til að drepa þetta er að kennarar segi að þetta sé kúl.“
Fairhurst, sem er prófessor í samskiptum og kennir tungutak alpha-kynslóðarinnar, segir að orðatiltækið gæti verið til marks um samfélag sem ferðast handan sannleikans, samskipti sem hafa aðeins þá merkingu sem fólk leggur í þau.
Þrátt fyrir leiðindin sjá fræðimenn jafnvel saklausan félagslegan tilgang: „Tungumál er leið fólks til að mynda samfélag,“ segir Fairhurst. „Jafnvel þótt þetta sé bullorð, ef þau virðast vita hvað það þýðir, getur það verið sameinandi afl. Og ef einhver skilur ekki hugtakið getur það líka útilokað fólk úr hópnum.“
Líklegt er talið að 6-7 sé nú þegar á leiðinni út, enda hefur það verið á sveimi í tæpt ár. Reynt hefur verið að koma að „41“ í staðinn.
Rétt eins og æðin með „skipidi toilet“ dvínaði, er óumflýjanlegt að 6-7 hverfi án frekari skýringar á tilgangi eða uppruna þess.
Athugasemdir