Tannlæknirinn Áslaug Óskarsdóttir varð fyrir líkamsárás árið 2004 við Hofsstaðaskóla.
„Ég var á göngu með vinkonu minni og við vorum í miðri kjaftasögu þegar það kom á móti okkur jeppi með blindandi ljós. Við reyndum að víkja frá en göngustígurinn var það þröngur að hliðarspegillinn small á mér,“ sagði Áslaug við DV um málið árið 2004 og sagði Áslaug að bílstjórinn hafi kennt sér um atvikið.
„Hann stökk foxillur út úr bílnum, tók mig hálstaki og kýldi mig illa í vinstra gagnaugað svo ég lá í götunni eftir tvær sekúndur. Svo reif hann af mér húfuna úr fínu kanínuskinni sem ég fékk í jólagjöf því hann náði ekki að lemja nógu vel á mér. Eftir það hreytti hann í mig fúkyrðum og ætlaði að kæra mig fyrir að skemma bíllinn sinn,“ hélt tannlæknirinn áfram. Áslaug hringdi í lögregluna eftir árásina en var ekki sátt með viðbrögð hennar.
„Lögreglan lét mig dæma um hvort þetta væri neyðarástand eða ekki og reyndi að yfirheyra mig í gegnum síma í rokinu. Svo kom lögreglubíll eftir korter, sem mér finnst að hefðu getað orðið dýrkeyptar mínútur ef þeir hefðu komið aftur að okkur,“ en hún var bálráð vegna málsins. „Við lifum eftir samfélagsreglum og þetta er gróft brot á þeim. Eiga þeir að komast upp með þetta, þessir siðblindu menn? Maður reynir að berjast gegn þessu. En þar sem þetta er þekktur afbrotaunglingur hérna í Garðabænum veit ég ekki hvers vegna hann var laus á götunni.“
Kristján Guðnason, yfirmaður rannsóknardeildarinnar, sagði við DV að tveir hefðu verið yfirheyrðir vegna málsins og annar þeirra væri grunaður. Hann vildi þó ekki segja hvort játning hafi komið fram.
Athugasemdir