Páll Winkel fangelsismálstjóri hafði samband við föður fangans sem fyrirfór sér á Litla-Hrauni um síðustu helgi. Faðirinn, Tómas Ingvason, glímir við mikla sorg og hafði sagt frá því að fangelsismálayfirvöld höfðu ekki haft samband við hann eftir sviplegt fráfall sonar hans. Annar sonur hans lést sjö árum fyrr, upp á dag. Tómas lýsti ánægju með samtalið við fangelsismálstjóra.
„Ég átti gott samtal við Pál Winkel. Hann hefur áhuga á að betrumbæta fangelsismál á Íslandi,“ segir Tómas Ingvarsson í samtali við Mannlíf.
Tómas ræddi við son sinn á föstudeginum áður en hann féll frá. Hann segir son sinn hafa kallað eftir hjálp í fangelsinu vegna þess sálarháska sem hann glímdi við. Honum hafi verið sagt að bíða fram yfir helgi en þá var of seint að hjálpa honum.
Komið var að lokum afplánunar fangans og hann var á Vernd þegar lögð var fram kæra hann. Sérsveitin handtók hann og flutti í fangelsið á Litla-Hrauni. Fangelsisyfirvöld hafa ekki staðfest að fanginn hefði óskað eftir hjálp.
Tómas segir að tregða sé í kerfinu að upplýsa um málið og að sem er að baki harmleiknum á Litla-Hrauni. „Maður finnur að menn eru hræddir um vinnuna sína. Þetta gengur ekki. Elítan hugsar um sína greinilega,“segir hann og vill stöðva meinta spillingu.
Tómas býr í Noregi en stefnir að því að koma til Íslands til að kveðja son sinn, hinstu kveðju.
Athugasemdir