Borgarstjórinn misstígur sig enn og aftur – Fyrst ævareiðir kennarar og nú Grafarvogsbúar

Íbúar í Graf­ar­vogi eru ævareiðir vegna ummæla Einars Þor­steins­sonar borg­ar­stjóra sem féllu í Bítinu á Bylgj­unni fyrr í vik­unni. Þar gerði hann lítið úr sjón­ar­miðum for­svars­manna íbúa­sam­taka svæð­is­ins sem eru á móti þeirri þétt­ingu byggðar sem boðuð í hverf­inu og tal­aði niður til þeirra. Einar sagði óánægju um upp­bygg­ingu í hverf­inu aðal­lega koma frá full­trúum Sjálf­stæð­is­flokks og vís­aði til for­manns íbúa­sam­taka í Graf­ar­vogi „sem ein­hverrar reiðrar konu“. Þessi ummæli borg­ar­stjór­ans þykja lykta af for­dómum gagn­vart konum.

„Ég hef séð hverjir hafa leitt þessa umræðu í Graf­ar­vogi. Það eru Guð­laugur Þór og Diljá Mist, borg­ar­full­trúar Sjálf­stæð­is­flokks­ins og aðrir sem leiða þessa umræðu. Sama fólk og segir að það vanti lóðir.“

Þetta er í annað sinn á skömmum tíma þar sem Einar Þor­steins­son, borg­ar­full­trúi Fram­sókn­ar­flokks­ins, mis­stígur sig í umræð­unni. Þess er skemmst að minn­ast að hann stuð­aði kenn­ara með yfir­lýs­ingum um veik­indi þeirra og fjar­veru frá nem­endum. Hann neydd­ist til að biðj­ast afsök­unar. Nú eru það íbúar í Graf­ar­vogi sem fá að finna til tevatns­ins.

Vísir fjall­aði ítar­lega um þessi mál. Deil­urnar um Graf­ar­vog snúa að því sem kall­ast ofur­þétt­ing byggðar. Íbúar krefj­ast þess að leitað verði lausna í sam­ræmi við þarfir og óskir þeirra. Í yfir­lýs­ingu frá íbúum í nágrenni við Sól­eyj­ar­tún lýsa þau helstu áhyggju­efni sínu við upp­bygg­ingu við Sól­eyj­ar­tún í Graf­ar­vogi. Þar er nefnd ofur­þétt­ing byggðar á grænu svæði, skugga­varp, ófull­nægj­andi bíla­stæða­fjöldi og erf­ið­leikar við snjó­mokstur. Þá segja íbú­arnir aukna umferð fylgja þétt­ing­unni og að öryggi barna sé stefnt í hættu.

Hópurinn ótt­ast að græn svæði hverfi fyrir þéttri byggð og hefur stofnað und­ir­skrifta­lista til að mót­mæla bygg­ingu á fjöl­býl­is­húsi á lóð við Smára­rima/Sól­eyja­rima.

„Hægt er að setja út á nán­ast allt sem fram kom í máli borg­ar­stjóra í morgun en sér í lagi full­yrð­ingar hans um að sam­ráð við íbúa hafi verið með stór­kost­legu móti. Það er alls ekki upp­lifun okkar íbúa Graf­ar­vogs. Þvert á móti hafa fæstir fengið nokkra kynn­ingu eða boð um sam­tal,“ segir í yfir­lýs­ingu íbúa­sam­tak­anna.

Undir yfir­lýs­ing­una skrifa þau Sigrún Ásta Ein­ars­dóttir, Vignir Þór Sverr­is­son, Elísabet Ein­ars­dóttir, for­maður íbúa­sam­taka Graf­ar­vogs, Berglind Krist­ins­dóttir og Jóhanna Lilja Hom. Á annað þús­und manns hafa skrif­lega mót­mælt áformunum um bygg­ingar við Smára­rima og Sól­a­yj­arrima.