Fjölmiðlamaðurinn góðkunni, Egill Helgason, er ávallt til í að viðra skoðanir sínar og ekki stendur á því eftir niðurstöður kosninganna.
Egill spyr:
„Er það Flokkur fólksins sem ræður því hvaða ríkisstjórn tekur við völdum?“
Agli finnst Flokkur fólksins vera „býsna illa skilgreinanlegur flokkur. Er hann til vinstri eða er hann til hægri?“
Hann færir í tal að „afhroð vinstrisins er rosalegt. Samfylkingin vinnur sinn stóra sigur en restin af vinstrinu er í rúst. Þrír flokkar, Píratar, VG og Sósíalistar og enginn þeirra kemur manni á þing. Hlýtur að kalla á einhverja endurhugsun.“
Minnist líka á Sjálfstæðisflokkinn sem sjaldan eða aldrei hefur náð eins slæmum árangri í kosningum og nú:
„Sjálfstæðisflokkur undir tuttugu prósentum er alveg nýr veruleiki – stórtap. Sigur Miðflokksins er minni en á horfðist í skoðanakönnunum – flokkurinn rak mjög skrítna kosningabaráttu sem var á mörkum einhvers konar skops. Samt er ekkert óhugsandi að flokkurinn verði í stjórn. D + M + F? Hver býður best í Ingu?“
Spyr einnig að þessu:
„Og hvað vill Viðreisn? Hún getur valið að vinna til hægri eða vinstri – en seinni kosturinn er ekki mögulegur án FF.“
Egill segir að endingu að „ný ríkisstjórn verður sennilega skrítin blanda, kannski mynduð af flokkum sem langar ekkert sérlega mikið að vinna saman og varla neitt sérlega stöðug. Getur maður spáð því að verði ekkert rosalega langt í næstu kosningar?“
Athugasemdir