Ýmislegt er að frétta úr dagbók lögreglunnar á höfuðborgarsvæðinu að venju
Einstaklingi var vísað út af neyðarskýli Reykjavíkurborgar sökum æsings. Tveimur klukkustundum seinna var sami aðili tilkynntur að hafa ráðist á annan skjólstæðing gistiskýlisins með flösku eftir að sá síðarnefndi sló hann. Þeir báðir mjög ölvaðir og ekki í ástandi til að vera meðal almennings. Báðir mennirnir voru síðan vistaðir í klefa.
Ágreiningur var milli mæðra í Reykjavík. Á vettvangi reyndi lögregla að stilla til friðar sem virtist vera að takast þegar móðirin, sem var töluvert ölvuð, kastaði litlum hundi sem hún var með í fanginu í bringu lögreglumanns. Hundurinn var sem betur fer ómeiddur eftir kastið. Móðirin var að lokum handtekin og vistuð í klefa vegna nokkurra brota.
Ökumaður var stöðvaður í umferðinni. Fljótlega vaknaði grunur að hann væri undir áhrifum fíkniefna og var hann því handtekinn. Á honum fannst síðan töluvert magn taflna, smelluláspoka og peninga þar sem grunur vaknaði um sölu fíkniefna. Aðspurður vildi ökumaðurinn ekki heimila lögreglu að skoða farsímann hans. Ökumaðurinn var vistaður í klefa í þágu rannsóknar málsins.
Það var einnig tilkynnt um tvo eldri menn sem voru til ama í miðborginni. Þeir neituðu báðir að gefa upp nafn og kennitölu og voru því handteknir. Þeir létu þó loks undan á lögreglustöðinni og gáfu það upp. Þeir lausir að því loknu.
Lögreglan þurfti að sinna útkalli um að barn hafi læst inni í herbergi í íþróttahúsi. Áður en lögregla kom hafi starfsmenn og foreldrar þó náð barninu út á heilu og höldnu.
Tilkynnt var um líkamsárás á dyravörð á bar í Hafnarfirði. Sá var mjög ölvaður, óðamála, talaði samhengislaust og andlega veikur en hann er góðkunningi lögreglunnar. Hann var vistaður í klefa.
Tilkynnt var um megna klórlykt á stigagangi fjölbýlis þar sem menn voru að hlaupa út úr íbúð í húsinu. Mikil ammoníaklykt var á vettvangi þegar lögregla kom og var slökkvilið fengið til þess að reykræsta íbúðina. Húsráðandi sagðist hafa verið að spreyja skordýraeitri inni í íbúðinni til þess að drepa flugur en hann var síðan fluttur til frekari aðhlynningar af sjúkraflutningsmönnum. Við skoðun í íbúðinni fannst vopn og nokkuð magn fíkniefna.
Athugasemdir