Búið er að ákæra hinn 26 ára gamla Luigi Mangione fyrir morðið á Brian Thompson, forstjóra sjúkratryggingafyrirtækis, en morðið átti sér stað í dagsbirtu á götum New York í síðustu viku.
Eftir að hafa myrt Thompson náði morðinginn að flýja af vettvangi og var Mangione handtekinn á McDonalds-stað í Pennsylvaníu í gær og hefur verið nú verið ákærður fyrir morðið. Í fórum hans fannst byssa, hljóðdeyfir, gríma, fölsuð skilríki og handskrifuð yfirlýsing. Talið er að hún innihaldi upplýsingar um af hverju hann myrti Thompson en ekki liggur nákvæmlega fyrir hvað stendur í þeirri yfirlýsingu.
Mangione er hámenntaður tölvunarfræðingur sem hefur starfað fyrir Firaxis Games, John Hopkins-háskólann og TrueCar.
Í bókadómi sem Mangione skrifaði á netið um Industrial Society and Its Future eftir Ted Kaczynski skrifaði hann:
„Hann var ofbeldisfullur einstaklingur, sem var réttilega fangelsaður, og réðst að saklausu fólki. Gjörðir hans eru oft sagðar á ábyrgð brjálaðs afturhaldssinna, en réttara er að skoða þær sem gjörðir byltingarsinna með öfgakenndar pólitískar skoðanir.“
Ljóst er að nú þegar hefur Mangione stuðning margra í Bandaríkjunum miðað við viðbrögðin á internetinu við morðinu en fá fyrirtæki í þar í landi eru jafn óvinsæl og sjúkratryggingafyrirtæki.
Athugasemdir