Fötluð kona skilin eftir ein við ókunna blokk: „Ferðaþjónusta fatlaðra er til háborinnar skammar“

„Ferða­þjón­usta fatl­aðra er til hábor­innar skammar,“ skrifar systir 72ja ára konu sem er með þroska­hömlun og lík­am­lega illa á sig komin. Konan fór með Ferða­þjón­ustu fatl­aðra í gær­kvöld og átti að skila henni heim í Skálatún í Mos­fellsbæ. Bíllinn kom, að sögn systur kon­unnar klukku­tíma of seint til að sækja hana. „Hún var ein í bílnum og átti að fara í Norð­ur­hlíð/Skála­túni. En hún var skilin eftir með göngu­grind­ina í ókunn­ugri blokk um 11 leytið á aðfanga­dags­kvöld,“ skrifar systirin í ítar­legri færslu á Facebook.

Konan stóð ein og ráð­villt við húsið í göngu­grind sinni. Hún getur að sögn systur hennar ekki gert sig skilj­an­lega við ókunn­uga og er ekki fær um að segja hvar hún býr. Það vildi henni til happs að íbúi í fjöl­býl­is­hús­inu sá hvernig komið var og þekkti kon­una.

„Til allrar ham­ingju var íbúi í blokk­inni sem sá hana og þekkti hana. Hann hringdi í 112 og gat sagt þeim að fyrir 20 árum hefði hún búið á Skála­túni. Hann hafði sam­band við náinn ætt­ingja (þá var búið að hringja í 112) og sagði frá því sem gerst hafði. Þess vegna frétti ég af því sem gerst hafði,“ skrifar systirin.

Hún segir að næt­ur­vaktin í húsi systur sinnar hafi þá verið nýbúin að hringja og undrað­ist að systir hennar var ekki komin heim. Hún vildi vita hvort hún væri enn í heim­sókn­inni.

„Í ókunnu blokk­ina komu sjúkra­flutn­ing­ar­menn og skil­uðu henni heim á Skálatún. Ég ræddi við systur mína í síma skömmu síðar og hún var ofboðs­lega hrædd. Skaðinn er skeður, ég er algjör­lega rasandi yfir þess­ari mann­fyr­ir­litn­ingu sem birt­ist í því að skilja mann­eskju sem ekki getur tjáð sig eftir aleina eftir í stiga­gangi í ein­hverri blokk. já ég er sjóð­andi reið en það vegur þyngra að systir mín hafi þurft að upp­lifa skelfi­legan ótta í alls ókunn­ugu umhverfi og án mögu­leika til að tjá sig,“ segir systir fötl­uðu kon­unnar í færslu sinni á Facebook í morgun. Hún seg­ist vera eilíf­lega þakk­lát mann­inum sem bar kennsl á hana og kom því til leiðar að hún kæm­ist heim til sín.

„Ég mun aldrei aftur reiða mig á Ferða­þjón­ustu fatl­aðra,“ skrifar hún að lokum.