„Ef sagan kennir okkur eitthvað þá kennir hún okkur að það gerist alltaf eitthvað óvænt og stórt. Lítum á nokkur dæmi. Hver hefði trúað því að við færum að tala um innrás og Grænland í sömu andrá? Hver hefði trúað því að við færum í alvörunni að tala um hættuna á yfirtöku gervigreindar á mannkyninu? Eða hættuna á að Golfstraumurinn myndi gera Ísland óbyggilegt?“ Þannig hefst Facebook-færsla Ágústs Ólafar Ágústssonar, lögmanns, hagfræðings og fyrrverandi varaformanns Samfylkingarinnar. Þar talar hann um þá áhugaverðu tíma sem við mannfólkið lifum á um þessar mundir. Hann heldur áfram:
„Og hver hefði trúað því fyrir nokkrum árum að öll landamæri heimsins myndu lokast á nokkrum dögum vegna heimsfaraldurs? Eða að stríð myndi blossa aftur upp í Evrópu og fasistar og jafnvel nasistar yrðu aftur kosnir á þing víða um heim? Að Trump yrði endurkjörinn?“
Að lokum bendir Ágúst Ólafur á frétt sem birtist í morgun, sem er nokkuð óhugguleg, og segir að kannski sé best að hætta að lesa fréttirnar og fara í göngu með hundinn:
„Og nú síðast í morgun bárust fréttir að það væru 1% líkur að stór loftsteinn myndi lenda á jörðinni jólin 2032 (sem eru víst jafnmiklar líkur og að sulla kaffibolla á sig um leið og maður hefur klætt sig…og það svo sannarlega gerist…)
Kannski er best að slökkva á fréttunum og fara bara út að labba með hundinn.“
Athugasemdir