Formaður Framsóknarflokksins – Sigurður Ingi Jóhannsson – segir að hann hafi verið meðvitaður um hvað stóð til á fundi Einars Þorsteinssonar borgarstjóra með oddvitum meirihlutans í borgarstjórn í gær, þar sem borgarstjóriu tilkynnti um að hann hafi ákveðið að slíta meirihlutasamstarfinu í borginni, en þetta kom fram á fréttavefnum Vísi.
„Ég hef fullan skilning á þessari ákvörðun,“ sagði Sigurður Ingi og bætti við:
„Einar var kosinn og okkar flokkur árið 2022 til að gera breytingar. Allar þær breytingar sem hann hefur viljað gera þá hefur hann verið í mótbyr innan meirihlutans. Það eru hlutir eins og húsnæðisuppbygging, hvort sem er upp í Úlfarsárdal eða Geldinganesi; það eru hlutir eins og að ganga lengra í að ná fram betri fjármálum borgarinnar. Það eru bílastæðamálin og leikskólamálin þar sem Einar hefur verið tilbúinn að horfa á nýjar lausnir eins og vinnustaðaskóla og fleira. Allt þetta hefur núverandi meirihluti ekki verið tilbúinn til.
Svo er það sem við höfum aðallega séð á síðustu vikum varðandi Reykjavíkurflugvöll. Ég varð fyrir miklum vonbrigðum þegar borgin framlengdi aðalskipulagið bara til 2032 þegar það er augljóst er að það tekur 15 til 20 ár að byggja nýjan flugvöll og þar af leiðandi hefði átt að framlengja til 2040. Ég hef því mikinn skilning á þeirri niðurstöðu sem hefur orðið.“
Sigurður Ingi og Einar voru í samskiptum fyrir fundinn örlagaríka:
„Við erum, eðli máls, miklir samherjar í Framsókn. Við höfum verið í miklum samskiptum, ekki bara síðustu daga, heldur líka síðustu vikur og mánuði um stöðuna,“ sagði formaðurinn Sigurður Ingi sem telur það vera eðlilegt að Framsókn hefji viðræður um myndun nýs meirihluta með Sjálfstæðisflokki, Viðreisn og Flokki fólksins, eins og boðað hefur verið:
„Já mér finnst það eðlilegt að leita eftir samkomulagi við þá flokka sem eru með málefnalegri meiri samstöðu heldur en núverandi meirihluti hefur sýnt. Ég vænti að það gangi vel eftir.“
Athugasemdir