Maðurinn sem fannst nær dauða en lífi í Gufunesi í gær og lést á spítala, var Þorlákshafnarbúi á sjötugsaldri.
Samkvæmt heimildum Mannlífs varð maðurinn, sem talinn er hafa verið myrtur, fyrir framheilabilun fyrir nokkrum árum. Framheilabilun getur almennt haft í för með sér persónuleika- og hegðunarbreytingar hjá einstaklingum, ásamt hvatvísi og hömluleysi.
Átta aðilar voru handteknir vegna málsins en þremur hefur nú verið sleppt. Nokkrir af þeim handteknu tengjast tálbeituhópi sem mikið hefur verið fjallað um í fjölmiðlum undanfarið.
Þá er einn hinna grunuðu þekktur ofbeldismaður en hann hefur meðal annars setið inni fyrir hrottalegt ofbeldisbrot.
Hinn látni fannst illa farinn á göngustíg í Gufunesi snemma í gærmorgun en lést stuttu eftir að hann kom á sjúkrahús. Samkvæmt Vísi hóf lögreglan leit að manninum á mánudagskvöld eftir að tilkynnt var að að hann hefði horfið af heimili sínu.
Í tilkynningu lögreglu um málið segir að rannsókn beinist að frelsissviptingu, fjárkúgun og manndrápi. Ákvörðun verður tekin um það seinna í dag hvort krafist verði gæsluvarðhalds yfir hinum handteknu.
Athugasemdir