Karl Héðinn Kristjánsson hefur sagt sig úr kosningastjórn Sósíalistaflokksins en það tilkynnti hann í yfirlýsingu sem hann birti á Facebook fyrir stuttu. Í yfirlýsingunni segist Karl Héðinn, sem er fræðslu- og félagsmálafulltrúi hjá Eflingu, ekki lengur geta starfað undir forystu sem hunsi lýðræðislega gagnrýni og refsi þeim sem benda á vandann.
Þá ber Karl Héðinn Gunnari Smára Egilssyni, formanni framkvæmdarstjórnar flokksins þungum sökum í yfirlýsingunni.
„Ég hef í mörg ár unnið af heilindum að því að byggja upp sterkan, lýðræðislegan og grasrótardrifinn flokk. Því miður hef ég í staðinn upplifað útskúfun fyrir að segja sannleikann um ofríki, andlegt ofbeldi og trúnaðarbrot formanns framkvæmdastjórnar, Gunnars Smára Egilssonar. Þeir sem verja hann hvað sem á dynur hafa tekið þátt í þeirri útskúfun – jafnvel á meðan þeir segjast styðja þolendur og berjast gegn ofbeldi. Ég er ekki einn um þessa upplifun og veit því miður um þó nokkur dæmi þar sem öflugir félagar fælast frá starfi vegna sambærilegra upplifanna.“
„Því miður hef ég í staðinn upplifað útskúfun fyrir að segja sannleikann um ofríki, andlegt ofbeldi og trúnaðarbrot formanns framkvæmdastjórnar, Gunnars Smára Egilssonar.“
Þá segir Karl Héðinn að góð vinna hafi verið unnin á vinnuhelgi flokksins um uppgjör á kosningabaráttunni fyrir síðustu kosningar, þar sem frambjóðendur úr öllum kjördæmum komu saman en markmikið hafi verið að læra af reynslu kosningabaráttunnar. Ýmsar tillögur hafi komið fram um það sem betur mætti fara en segir hann að lítil valdaklíka hafi ákveðið að hunsa niðurstöður vinnuhelgarinnar.
„Í stað þess að vinna raunverulega með þessa vinnu ákvað lítill valdakjarni innan framkvæmdastjórnar að hunsa þessa niðurstöðu og boða til sameiginlegs fundar stjórna um niðurstöðu netkönnunar sem túlkuð var þannig að „allt væri í lagi.“ Gagnrýni var afskrifuð sem fáfræði og niðurrifsstarfsemi, og enn á ný var reynt að þagga niður í þeim sem vilja bæta flokkinn undir formerkjum þess að þeir sem gagnrýni séu fáfróðir eða hreinlega illa innrættir. Ég tek fram að á vinnuhelginni kom fram sú hugmynd að gott væri að flokkurinn gerði tíðari skoðanakannanir á meðal félagsmanna en þær verður að hanna vísindilega svo þær mæli raunverulega það sem við viljum mæla. Og að hunsa vinnu virkrar grasrótar, stjórnarmanna og frambjóðenda úr Alþingiskosningunum á þennan máta eru ömurleg vinnubrögð.“
„Skortur á lýðræði og fjárhagslegt ábyrgðarleysi“
Og Karl Héðinn hélt áfram:
„Skortur á lýðræði og fjárhagslegt ábyrgðarleysi:
Gunnar Smári sniðgekk vinnuhelgina – þrátt fyrir að vera formaður framkvæmdastjórnar og oddviti flokksins í Reykjavík norður í síðustu kosningum. Þess í stað hefur hann, með dyggri aðstoð þeirra sem standa honum næst, haldið áfram að úthýsa gagnrýnisröddum og gaslýsa þá sem kalla eftir eðlilegri endurskoðun á störfum hans.
Tvö félög, Alþýðufélagið og Vorstjarnan, fá samanlagt nær öll framlög flokksins – en hvorugt þeirra starfar eftir opnum og lýðræðislegum reglum. Alþýðufélagið, sem á og rekur Samstöðina, er í raun einkafélag Gunnars Smára. Stjórn þess er sýndarstjórn, engir félagsfundir eru haldnir, og engin leið er fyrir almenna félagsmenn að hafa áhrif á starfsemi þess.”
Segist hann ekki hafa gefist upp á Sósíalistaflokknum og ætli sér að halda áfram að starfa með ungliðadeildinni.
„Stéttastríðið stigmagnast og heimurinn að brenna, Sósíalistaflokkurinn þarf að fullorðnast. Ég mun aldrei gefast upp á baráttunni fyrir réttlæti og betra samfélagi, en sú barátta verður að byggjast á heilindum og lýðræði – ekki klíkuskap og valdabrölti. Slíkt mun einfaldlega ekki virka.”
Skyndifundur boðaður
Gunnar Smári Egilsson brást við ásökunum Karls Héðins á Facebook-síðu sinni og boðaði til skyndifundar sem haldinn verður í kvöld.
Gunnar Smári skrifaði:
„Í tilefni af ásökunum sem Karl Héðinn Kristjánsson, fyrrum stjórnarmaður í Kosningastjórn Sósíalistaflokksins, á hendur mér, boða ég, Gunnar Smári Egilsson, formaður framkvæmdastjórnar Sósíalistaflokksins til skyndifundar í félagsheimili Vorstjörnunnar í Bolholti 6 klukkan 18 í dag, 12. mars.
Þar mun ég fara yfir opið bréf Karls og ræða þau atriði þess sem snúa að mér og greina frá starfi flokksins á undanförnum misserum. Þau sem vilja kynna sér málin í kjölfar lestrar bréfs Karls eru hvött til að mæta.
Fundurinn er öllum opinn.”
Athugasemdir