Eftir að Donald Trump Bandaríkjaforseti tilkynnti um tollastríð sitt við heiminn, skrifaði sagnfræðingurinn Stefán Pálsson færslu á Facebook þar sem hann talar um ofurtolla sem Trump setti á Afríkulandið Lesótó.
„Lesótó og ruglið í Trump:
Á tollalistanum sem Bandaríkjaforseti kynnti hróðugur í dag vekur nokkra athygli að Afríkulandið Lesótó fær á sig 99% toll, sem er með því hæsta af öllum ríkjum heims. Af hverju í ósköpunum Lesótó? Hvað hafa þeir gert af sér til að verðskulda reiði forsetans?“ Þannig hefst færsla sagnfræðingsins skarpskyggna. Stefán svarar svo eigin spurningu:
„Jú, þegar Trump ávarpaði þingið á dögunum þá tiltók hann sérstaklega sem dæmi um fáránlegar styrkveitingar Bandaríkjamanna að risaupphæð færi í LGBTQ-verkefni í Lesótó - landi sem enginn hefði heyrt um að væri til, bætti hann við og þingheimur hló að fyndni hans.“
Stefán segir þó veruleikann allt annan og alvarlegri:
„Veruleikinn er reyndar sá að Lesótó hefur fengið mikilvæg fjárframlög í gegnum heilbrigðisverkefni sem Bandaríkin styðja á sviði kynsjúkdóma því allt að fjórðungur íbúa þessa fátæka lands er með HIV og mögulega enginn staður á byggðu bóli sem hefur farið verr út úr þeim faraldri. Stuðningur við fórnarlömb alnæmis í Lesótó heitir í kollinum á Trump: LGBTQ-verkefni. Nú er búið að skrúfa fyrir stuðninginn og þökk sé þessari meinloku mun Lesótó fá á sig ofurtolla að auki.“
Afleiðingarnar verða afar slæmar fyrir efnahag Lesótó að sögn Stefáns, enda atvinnulífið þar mjög háð útflutningi til Bandaríkjanna:
„Og hverjar verða afleiðingarnar? Jú, atvinnulífið í Lesótó er mjög aðlagað að útflutningi til Bandaríkjanna. Þar er einkum um að ræða saumaiðnað með sérstakri áherslu á gallaefni. Ef þið kaupið ykkur Wrangler eða Levis-gallabuxur þá eru allar líkur á að stór hluti saumavinnunnar (s.s. vasar og álíka) hafi verið unnin í Lesótó - það eru bara síðustu frágangsatriðin sem eru kláruð í Bandaríkjunum til þess að hægt sé að setja „Made in USA“ á miðann.
Þessar gallabuxur verða því óhjákvæmilega dýrari og vandséð hvað Wrangler og Levis eiga að gera í málinu Sér einhver í alvörunni fyrir sér að bandarískur saumaiðnaður muni keppa í verðum við saumastofurnar í Lesótó þar sem launakostnaðurinn er ekki nema brotabrot?“
Athugasemdir