Reiði kraumar í Idaho vegna lögregluskotárásar í fylkinu en fyrir stuttu var birti myndband sem sýnir hóp lögreglumanna skjóta ungling með hníf, en fjölskylda drengsins segir að hann sé mállaus, með einhverfu og þjáist af heilalömun.
Atvikið átti sér stað í bænum Pocatello á þriðjudaginn þar sem lögreglan skaut 17 ára Victor Perez níu sinnum í garðinum fyrir utan heimili hans og hann liggur nú í lífshættu samkvæmt frétt Associated Press, sem segir einnig að Perez hafi þurft að gangast undir aflimun á fæti.
Myndband af skotárásinni fór eins og eldur um sinu á netinu og hefur leitt til mótmæla fyrir utan lögreglustöðina í Pocatello. Fólk spyr sig hvers vegna fjórir lögreglumenn sem komu á vettvang virðast hafa brugðist of harkalega við og hafi ekki gert nægilega til að afstýra ástandinu áður en þeir hófu skothríð.
Myndband sem nágranni tók sýnir unglinginn í garðinum með hníf í hendi, þar sem hann á samskipti við aðra. Lögreglan kemur á staðinn og lögreglumenn hlaupa í átt að garðinum með vopn sín dregin. Þeir virðast gefa einhver fyrirmæli en þegar drengurinn stendur upp af grasinu og stígur nokkur skref að girðingunni sem skilur þau að hefur lögreglan skothríð sína.
Frænka drengsins sagði við fjölmiðla að lögreglan hafi ekki spurt hvað væri í gangi þegar þeir komu á staðinn og hún segir að Victor geti varla gengið og hafi þroska sem samsvarar fimm ára barni.
Lögreglan segir að þeir hafi brugðist við eftir að símtal barst þar sem tilkynnt var um heimilisofbeldi þar sem einstaklingur með hníf virtist vera undir áhrifum. Fjölskylda drengsins segir hann ekki hafa verið undir áhrifum, heldur gangi hann óstöðugt vegna heilalömunar.
Samkvæmt myndbandinu tók það aðeins um 12 sekúndur frá því að lögreglan kom að heimili fjölskyldunnar þar til Perez var skotinn.
Roger Schei, lögreglustjóri í Pocatello, segir að lögreglumenn taki ákvarðanir á örfáum sekúndum og meti hættur. Hann segir að í þessu tilviki hafi „tveir einstaklingar verið aðeins nokkrum fetum frá vopnuðum, óhlýðnum einstaklingi. Hættan var bráð og ástandið þróaðist hratt.“
Schei segir að árekstrarannsóknarteymi rannsaki málið.
Athugasemdir