Bandaríski öldungadeildarþingmaðurinn Bernie Sanders var einn af óvæntum hápunktum Coachella-hátíðarinnar um helgina þegar hann birtist óvænt og dró til sín fjölda áhorfenda á laugardaginn.
Aðdáendur hlupu í áttina að honum með símana á lofti til að ná myndskeiðum af óvæntri ræðu hans sem hann hélt stuttu eftir magnaða tónleika söngkonunnar Charli XCX á nærliggjandi sviði.
„Ég ætla ekki að tala lengi en þessi þjóð stendur frammi fyrir mjög erfiðum áskorunum og framtíð Bandaríkjanna veltur á ykkar kynslóð,“ sagði Sanders við mikinn fögnuð. Hátíðin markar óopinberlega upphaf tónlistarhátíðatímabilsins í Bandaríkjunum.
„Þið getið ákveðið að horfa í aðra átt og hunsa það sem er að gerast, en þá gerið þið það á eigin ábyrgð. Við þurfum þess að þið standið upp og berjist fyrir réttlæti, efnahagslegu, kynþátta- og félagslegu réttlæti.“
Fyrr sama dag höfðu Sanders og þingkonan Alexandria Ocasio-Cortez haldið fjöldafund sem skipuleggjendur segja að hafi dregið að sér 36.000 manns. Sá fundur var hluti af „Baráttunni gegn auðræði“, ferð þeirra um landið sem meðal annars innihélt tónlistaratriði með Neil Young, Maggie Rogers og Joan Baez.
Sanders, sem flutti ræðuna undir fullu tungli, hvatti fólkið til að rísa gegn milljarðamæringum, sjúkratryggingafélögum og stjórn Donalds Trump Bandaríkjaforseta.
„Nú höfum við forseta Bandaríkjanna,“ byrjaði Sanders, en þá tók fólkið að baula og hæðast að nafni Trumps.
„Ég er sammála,“ hélt Sanders áfram. „Hann heldur að loftslagsbreytingar séu blekking. Hann hefur alvarlega rangt fyrir sér og við verðum að rísa gegn jarðefnaiðnaðinum og segja honum að hætta að eyðileggja þessa plánetu.“
„Nákvæmlega rétta hreyfingin“
Sanders kynnti síðan tónlistarkonuna Clairo á svið og þakkaði henni fyrir að nota áhrif sín í þágu félagslegs réttlætis.
„Ég er hér vegna þess að Clairo hefur notað frægð sína til að berjast fyrir réttindum kvenna og til að reyna að binda enda á hið hræðilega, grimmilega stríð á Gaza, þar sem þúsundir kvenna og barna hafa verið drepin,“ sagði hann. „Ég vil þakka Clairo ekki bara fyrir að vera í frábærri hljómsveit, heldur líka fyrir það mikilvæga starf sem hún vinnur.“
Skilaboðin höfðu áhrif: „Ég elska Bernie Sanders!“ hrópaði ein hátíðarstelpa þegar þingmaðurinn, sem er sósíalisti að eigin sögn og starfar með Demókrötum, lauk ræðu sinni.
Samara Guillory, 21 árs, var meðal þeirra sem hlupu að sviðinu þegar Sanders kom fram.
„Það skipti mig miklu máli að Sanders skyldi koma og tala beint til okkar,“ sagði hún í samtali við AFP. „Við erum nýja kynslóðin, við erum framtíð Bandaríkjanna.“
„Að mæta hingað, tala við okkur og auka meðvitund – þetta var nákvæmlega það sem þurfti, í alvöru talað.“
Athugasemdir