Landsbankinn hagnaðist um 7,9 milljarða króna eftir skatta á fyrstu þremur mánuðum ársins, sem er aukning úr 7,2 milljörðum króna á sama tíma í fyrra.
Arðsemi eigin fjár eykst þónokkuð, úr 9,3% á sama tíma í fyrra í 10% nú. Þetta kemur fram í tilkynningu frá bankanum. Landsbankinn er í eigu íslenska ríkisins.
Afkomutölurnar sýna að hagnaðurinn var 86 milljónir á hverjum degi. Hann var 3,6 milljónir á klukkustund og 60 þúsund krónur á hverri mínútu. Og þar af leiðandi hagnaðist Landsbankinn um þúsund krónur á hverja sekúndu, alla daga og allan sólarhringinn á fyrstu þremur mánuðum ársins.
Bankastjórinn, Lilja Björk Einarsdóttir, segir að afkoman hafi verið „traust“.
„Traustur rekstur bankans gerir okkur kleift að viðhalda 2,1% vaxtamun heimila en skila jafnframt ásættanlegri arðsemi í rekstri bankans og greiða hluthöfum jafnan arð. Bankinn er með ánægðustu viðskiptavini meðal viðskiptabankanna. Árangur bankans er góður og starfsfólk leggur sig fram við að veita viðskiptavinum framúrskarandi þjónustu. Þrátt fyrir krefjandi ytra umhverfi er bankinn í sterkri stöðu til að styðja við íslenskt samfélag.“
Hreinar vaxtatekjur, sem eru munur á innláns- og útlánsvöxtum, voru 14,8 milljarðar króna en þær námu 14,4 milljörðum króna á sama tímabili 2024. Helst það rétt tæplega í hendur við þróun verðlags á sama tímabili.
Sterk afkoma kemur þrátt fyrir að „óróleiki á mörkuðum og óvissa í alþjóðamálum [hafi sett] mark sitt á fjórðunginn með ýmsum hætti.“
Lánshæfismat Landsbankans styrkist nýverið. „Á mánudaginn var tilkynnt um að alþjóðlega matsfyrirtækið S&P hefði hækkað lánshæfismat bankans upp í A-flokk, úr BBB+ í A-,“ segir bankastjórinn.
Á aðalfundi Landsbankans í mars var samþykkt að greiða 18,9 milljarða króna í arð til hluthafa vegna reksturs síðasta árs. Íslenska ríkið á meira en 98% hlutafjár í bankanum.
Athugasemdir