Fyrrverandi embættismaðurinn og vopnasalinn Mikhail Khubutia stendur nú frammi fyrir ákærum eftir að hafa, að sögn, ráðist á fyrrverandi kærustu sína með öxi. Yulia Wang, sem á barn með Khubutia, hefur sakað hann um að hafa reynt að drepa sig í lok apríl. Hún hlaut alvarlega áverka í árásinni og málið er nú komið til rannsóknar lögreglu, sem hefur formlega hafið rannsókn á líkamsárás og hótunum um líflát. Khubutia hefur neitað öllum ásökunum.
Árásin átti sér stað þann 24. apríl í heimili Wang í Trekhgorka, þorpi rétt utan við Moskvu. Fjölmiðlamiðaða Telegram-rásin Ostorozhno Novosti greindi fyrst frá málinu daginn eftir. Samkvæmt frásögnum vina Wang var það Khubutia sem réðst á hana í eigin íbúð. Þegar lögregla og sjúkraliðar komu á vettvang hafði Khubutia þegar flúið. Wang var flutt á sjúkrahús með alvarlega áverka og myndband sem sýnt var á samfélagsmiðlum sýndi blóðbletti í svefnherbergi hennar.
Síðar sama kvöld birti Wang myndband á Instagram þar sem hún lýsti árásinni og sakaði Khubutia um að hafa ráðist á sig með öxi. „Hann skar mig og sló mig í höfuðið. Þetta gerðist allt á meðan dóttir okkar og barnfóstran sváfu í næsta herbergi,“ sagði hún í myndbandinu. Hún bætti við að hún væri undir lækniseftirliti og hefði fengið djúp sár á handleggjum og fótleggjum sem hefði þurft að sauma.
Þann 28. apríl greindi lögreglan í Moskvu frá því að rannsókn væri hafin vegna líkamsárásar og hótana um líflát, þó án þess að nafngreina hinn grunaða. Fjölmargar aðrar fréttaveitur og Telegram-rásir greindu þó frá því að málið tengdist Khubutia.
„Ég ætla að drepa þig!“
Í viðtali sem sjónvarpskonan Ksenia Sobchak birti á YouTube þann 1. maí og hefur fengið yfir 1,4 milljón áhorf, lýsir Wang árásinni nánar. Hún sat þá í hjólastól, með fót í spelku og báðar hendur vafðar. Wang segir að samband hennar við Khubutia hafi staðið frá 2018 en þau slitið því fyrir ári. Í kjölfarið hafi hann hótað henni ítrekað. Um kvöldið 24. apríl hafi hann komið til hennar um klukkan 23 og fljótlega ráðist á hana, fyrst með handafli og síðan með veiðiöxi, sem hann notaði til að ráðast á fótleggina hennar.
Hún segir hann hafa öskrað „Ég ætla að drepa þig!“ og að hún hafi þóst vera látin til að komast undan frekari árás. Þegar hann hélt að hún væri dauð, hætti hann, tók öxina og yfirgaf vettvanginn.
Öryggismyndavélaefni sýnir karlmann, sem Wang segir vera Khubutia, koma í þorpið í svörtum Range Rover um tíuleytið um kvöldið. Sama myndavél sýnir hann svo yfirgefa hús Wang síðar og flýja í sömu bifreið.
Wang sagði einnig að barnfóstran Tatyana hafi ekki brugðist við þegar hún kallaði á hjálp. Fóstran sagðist hafa tekið róandi lyfið fenazepam áður en hún fór að sofa og því ekkert heyrt. Hún greindi jafnframt frá því að Khubutia hafi greitt henni laun. Wang sagði einnig að fóstran hafi þrátt fyrir beiðni hennar þrifið vettvanginn, sem hún telur hafa spillt mögulegum sönnunargögnum.
Lögreglan tók hvorki fingraför né myndbandsupptökur frá öryggismyndavélum við komu á staðinn, að sögn Wang. Hún var fyrst flutt á sjúkrahús í Zvenigorod en segir að hún hafi fengið lélega meðferð þar. Fjölskylda hennar flutti hana því á einkareknu Olymp Clinic MARS í Moskvu, þar sem læknir staðfesti að hún væri með marga skurði, brotinn fótlegg og úlnlið. Lögmaður Wang segir ástand hennar vera alvarlegt, þrátt fyrir að það sé ekki formlega skráð þannig.
Wang segir einnig að Khubutia hafi ráðist á hana áður, fyrir þremur árum, en þá hafi hún ekki kært hann þrátt fyrir að hafa hlotið heilahristing. Eftir sambandsslitin hafi hann hótað henni með forsjá barns þeirra og hótað að senda hana á geðdeild.
Khubutia neitar öllu og sagði í viðtali við ríkisvæddu sjónvarpsstöðina REN TV að þetta væri „algjört bull“. Upphaflega sagðist hann ekki hafa verið í Moskvu þegar árásin átti sér stað, en síðar viðurkenndi hann að hafa heimsótt Wang sama kvöld og árásin átti sér stað, þó hann neitaði að hafa beitt hana ofbeldi.
Khubutia kallaði Wang „slæma stelpu“ sem væri að reyna að svíkja út peninga og sakaði nýja kærasta hennar um að hafa ráðist á hana.
Frá ráðherra til vopnasala
Mikhail Khubutia, sem er 58 ára, gegndi háttsettum embættum í Rússlandi á fyrsta áratug 21. aldar, m.a. sem viðskiptaráðherra í Moskvu-héraði. Hann er nú tengdur vopnasölu og er kallaður „vopnakóngur“ í fjölmiðlum. Í febrúar 2024 greindi rannsóknarmiðillinn The Insider frá því að fyrirtæki tengd honum hafi brotið gegn alþjóðlegum refsiaðgerðum með því að flytja vopn frá Ítalíu til Rússlands.
Hann á einnig fyrirtækið Torgovy Dom Shater, sem rekur sýningarhöllina Gostiny Dvor í miðborg Moskvu. Þar fer m.a. fram árlega bein útsending með Vladímír Pútín og ýmsar vopnasýningar, þar sem Khubutia gegnir einnig formennsku í stjórn.
Yulia Wang rekur litla te-sjoppu að nafni Van Tea í miðborg Moskvu.
Rússneski útlagamiðillinn Meduza fjallaði um málið.
Athugasemdir