Karl III Bretlandskonungur virtist eitt augnablik missa þolinmæðina þegar hann sótti minningarathöfn vegna 80 ára afmælis Sigurdagsins í Evrópu (e. VE Day) í gær, 8. maí. Athöfnin fór fram í Westminster Abbey í Lundúnum og var konungurinn þar í fylgd með Kamillu drottningu. Þar voru einnig mættir 78 uppgjafahermenn og um 2.000 gestir í kirkjunni.
Atvik vakti athygli þegar konungurinn virtist sýna óánægju vegna þess að hann hafði ekki verið formlega kynntur fyrir einum af uppgjafarhermanninum. Sérfræðingur í varalestri, Jeremy Freeman, greindi frá því að Karl III hefði hvíslað pirraður til Kamillu: „Ótrúlegt, hvar eru kynningarnar mínar?“
Konungurinn leit í kringum sig og virtist leita eftir aðstoðarmanni sínum sem kom fljótlega til hans. Karl sneri sér þá snöggt að honum og spurði: „Hvar, hvar varstu?“ Aðstoðarmaður birtist þá við hlið hans og konungurinn hélt áfram að heilsa upp á uppgjafarhermennina.
Ásamt konungshjónunum voru Vilhjálmur prins og Katrín prinsessa einnig viðstödd athöfnina, ásamt forsætisráðherra Bretlands, Keir Starmer.
Karl III lagði blómsveig á gröf óþekkta hermannsins með áletruninni: „Við munum aldrei gleyma.“ Vilhjálmur prins tók í sama streng og bætti við: „Fyrir þá sem fórnuðu öllu í síðari heimsstyrjöldinni. Við munum minnast þeirra.“
Athöfnin hófst með tveggja mínútna þögn sem var haldin um allt land til að minnast uppgjafar nasista.
Konungsfjölskyldan ræddi einnig við uppgjafarhermennina eftir athöfnina og vakti Karl konungur sérstaka athygli fyrir einlægar og djúpar samræður við þá. Anna prinsessa sýndi hlýju í samskiptum við eldri konu í hjólastól sem bar stríðsmedalíur.
Fleiri meðlimir konungsfjölskyldunnar heiðruðu minninguna um fallna hermenn, þar á meðal Eðvarð hertogi og Soffía hertogaynja af Edinborg, Anna prinsessa og eiginmaður hennar Tim Laurence, auk hertogahjónanna af Gloucester og hertogans af Kent.
Trompetleikarar tóku á móti konungshjónunum við komu þeirra en Karl konungur var klæddur í dökkgrá jakkaföt og Kamilla í hvítan silkikjól með krumpáferð og samsvarandi kápu.
Einn áhrifamesti punktur dagsins var þegar Alexander Churchill, 10 ára, og langafabarn Sir Winston Churchill, flutti ræðu við athöfnina. Hann sagði meðal annars:
„Langalangafi minn var mjög mikilvægur fyrir okkur og við erum mjög stolt af að hann sé hluti af fjölskyldu okkar. Ég held að það sé mikilvægt fyrir okkar kynslóð að þakka öllum uppgjafarhermönnum og þeim sem tóku þátt í stríðinu.“
Hann bætti við: „Fólk má ekki gleyma þeim sem fórnuðu sér til að frelsa England og Evrópu. Það er mikilvægt að halda áfram að berjast fyrir frelsi.“
Athugasemdir