Ágúst Ólafur Ágústsson, fyrrum varaformaður Samfylkingarinnar bendir á sérhagsmuni Íslendinga sem skemmt hafa fyrir náttúrunni í heiminum öllum. Þingmaðurinn fyrrverandi fór á forsýningu nýju heimildarmyndar Sir David Attenborough, Ocean.
Segir Ágúst í Facebook-færslu sem birtist í morgun, að myndin sé sláandi en hún fjalli meðal annars um skaðsemi botnvörpuveiða, sem Íslendingar stunda enn þann daginn í dag og bendir á að íslensk yfirvöld hafi fyrir 20 árum átt afar stóran þátt í að tillaga um alþjóðlegt bann við slíkum veiðum í úthöfunum var felld á allsherjarþingi Sameinuðu þjóðanna.
„Í gær var ég viðstaddur forsýningu Ocean sem skartar David Attenborough. Forseti Íslands hélt þar góða ræðu og brýndi almenning til dáða. Myndin er sláandi en fjallar m.a. um skaðsemi botnvörpuveiða sem skrapa botninn og eyðileggja mikið. Botnvörpuveiðar eru ein versta leiðin til að veiða fisk. Botnvörpuveiðar eru einnig taldar losa jafnmikið af koltvísýringi og flugsamgöngur.
Íslendingar stunda ennþá umfangsmklar botnvörpuveiðar. Ég man þegar ég var á Alþingi fyrir næstum 20 árum þegar íslensk stjórnvöld þess tíma áttu mjög stóran þátt í að tillaga um alþjóðlegt bann við botnvörpuveiðum á úthöfunum var felld á allsherjarþingi Sameinuðu þjóðanna. Íslensk stjórnvöld söm við sig með því að fylgja vondum sérhagsmunum, eins og oft áður.“
Að lokum talar Ágúst um stórhvalaveiðar Íslendinga og skilaboð Attenborough um gríðarlegt mikilvægi þess að vernda höfin. Spyr Ágúst hvort ekki sé kominn tími fyrir Íslendinga að hætta að fara „í vitlausa átt“, þegar snýr að dýra- og náttúruvernd.
Myndin fjallar einnig um mikilvægi hvala fyrir jafnvægi í vistkerfinu og jafnvel fyrir loftslagið.
„Íslendingar leyfa einir þjóða stórhvalaveiðar í iðnaðarstíl. Aftur Ísland í sérhagsmununum.
David Attenborough segir að myndin fjalli um mikilvægustu skilaboðin sem hann hefur flutt á sínum 99 árum: Með því að bjarga sjónum, björgum við heiminum.
Hvernig væri þá að Íslendingar hættu að fara í vitlausa átt, rétt eins og þeir gera á svo mörgum sviðum dýra- og náttúruverndar?.“
Athugasemdir