Sigurvegari Eurovision-keppninnar í ár, austurríski söngvarinn JJ, hefur kallað eftir því að Ísrael verði útilokað frá keppninni að ári. Hann lýsti einnig yfir eftirsjá yfir því að Ísrael hafi yfirhöfuð tekið þátt í ár, þrátt fyrir stríðið á Gaza. Þetta kemur fram í frétt Guardian.
Eurovision hefur sætt gagnrýni fyrir að leyfa Ísrael að keppa þrátt fyrir hörmungarnar á Gaza. Um helgina mótmæltu Palestínu-sinnar þátttöku Ísraels í keppninni með sýnilegum hætti í Sviss, þar sem keppnin fór fram. Rússland hefur hins vegar ekki fengið að taka þátt í Eurovision síðan innrás þess í Úkraínu hófst árið 2022.
„Það er mjög svekkjandi að sjá að Ísrael taki enn þátt í keppninni,“ sagði hinn 24 ára kontratenór JJ í viðtali við spænska dagblaðið El País. „Ég myndi vilja að næsta Eurovision yrði haldið í Vín án Ísraels,“ bætti hann við.
„En boltinn er hjá skipuleggjendunum,“ sagði hann og vísaði þar til Evrópska sjónvarpsbandalagsins (EBU). „Við, listafólkið, getum aðeins lýst skoðunum okkar á málinu.“
JJ, sem heitir réttu nafni Johannes Pietsch, kallaði jafnframt eftir „meira gagnsæi“ í tengslum við almenningsatkvæðagreiðsluna, eftir að ísraelski söngvarinn Yuval Raphael hafnaði í öðru sæti.
Raphael lifði af árás Hamas þann 7. október 2023, sem varð til þess að Ísraelsher réðist að fullum þunga á Gaza. Hann faldi sig undir líkum eftir að vopnaðir menn réðust á tónlistarhátíð og drápu hundruð manna.
„Í ár gerðist allt með mjög undarlegum hætti,“ sagði JJ.
Ummæli hans hafa mætt gagnrýni í Austurríki, sem er eitt af dyggustu bandalagsríkjum Ísraels í Evrópu. Ríkisútvarpið ORF fjarlægði sig frá yfirlýsingum hans og sagði þær „endurspegla persónulega skoðun“. JJ sagði í gegnum útgáfufyrirtækið Warner að hann harmi ef orð hans hafi verið mistúlkuð.
Á mánudag tók Pedro Sánchez, forsætisráðherra Spánar og einn harðasti gagnrýnandi ísraelskra yfirvalda í Evrópu, undir kröfuna og sagði að Ísrael ætti að vera útilokað frá Eurovision. Hann lýsti yfir samstöðu með „fólki Palestínu sem þjáist vegna óréttlætis stríðs og sprengjuárása“.
„Við getum ekki unað við tvöfalt siðgæði í menningu,“ sagði Sánchez, og vísaði þar til bannsins sem Rússland fékk eftir innrás sína í Úkraínu.
Ísrael stendur nú frammi fyrir mikilli alþjóðlegri gagnrýni vegna hernaðaraðgerða sinna á Gaza og skorts á aðgangi fyrir nauðsynlega mannúðaraðstoð. Samkvæmt tölum AFP, sem byggja á opinberum gögnum, létust 1.218 manns í Ísrael í árás Hamas, flestir almennir borgarar. Í kjölfarið hefur Ísrael hafið gagnárás sem samkvæmt heilbrigðisráðuneyti Hamas í Gaza hefur kostað minnsta kosti 53.762 manns lífið þar, aðallega konur og börn.
Athugasemdir