Liverpool-borg varð fyrir áfalli í gær þegar bifreið var ekið inn í mannfjölda sem saman var kominn í miðborginni. Atvikið átti sér stað um klukkan 18:00 þegar fjöldi fólks var saman kominn til að fagna Englandsmeistaratitli Liverpool FC, en talið er að hundruð þúsunda hafi verið viðstödd sigurgöngu liðsins.
Alls voru 27 manns fluttir á sjúkrahús, þar af fjögur börn. Lögreglan handtók karlmann, 53 ára gamlan hvítan Breta frá Merseyside, sem grunaður er um að hafa verið ökumaður bifreiðarinnar. Lögregla útilokar hryðjuverk.
Borgarstjóri: Fjórir enn alvarlega slasaðir
Steve Rotherham, borgarstjóri Liverpool, greindi frá því að fjórir væru enn „mjög, mjög veikir“ á sjúkrahúsi þegar nýr dagur rann upp og borgin er enn að melta atburðinn. Fjölmargar spurningar hafa vaknað í kjölfarið og hér fyrir neðan er yfirlit yfir helstu atburði gærdagsins:
Kl. 17:50 – Gleðin í hámarki
Tíu mínútum áður en ódæðið átti sér stað var gleðin í algleymingi á Strand í Liverpool. Liverpool FC hafði þá lokið sigurgöngu sinni í gegnum Allerton, sem hófst kl. 14:00, og tónlistarmaðurinn Calvin Harris lék lagið One Kiss þegar ódæðið gerðist.
Kl. 18:00 – Bifreið ekur á mannfjöldann
Bifreið ók inn í mannfjöldann á Water Street. Vitni lýstu því hvernig bílstjórinn „flautaði“ á meðan hann þröngvaði bílnum í gegnum þéttan hóp stuðningsmanna Liverpool. Fólk öskraði af skelfingu og í myndefni mátti sjá örvæntingu og reiði þegar bifreiðin stoppaði ekki. Lögregla og sjúkralið voru fljót á vettvang og fólk reyndi að aðstoða hina slösuðu.
Sjá mátti fólk lemja á bifreiðinni á meðan ökumaðurinn reyndi að bakka og aka áfram. Lögregla, sjúkrabílar og slökkvilið komu strax á vettvang og einnig var kallað eftir þyrlu frá bráðaliði Norður-Englands.
Kl. 19:00 – Lögregla staðfestir handtöku
Merseyside-lögreglan sendi frá sér tilkynningu kl. 19:00 þar sem staðfest var að karlmaður frá svæðinu hefði verið handtekinn. Í yfirlýsingunni sagði:
„Við fengum tilkynningu rétt eftir kl. 18:00 um að bifreið hefði keyrt á gangandi vegfarendur á Water Street. Bifreiðin stöðvaðist á vettvangi og ökumaðurinn var handtekinn. Neyðarþjónustur eru nú á vettvangi.“
Kl. 19:33 – Forsætisráðherra bregst við
Forsætisráðherrann Keir Starmer sagði atvikið „skelfilegt“ og þakkaði viðbragðsaðilum fyrir skjót viðbrögð. Hann sagðist vera í stöðugu sambandi við yfirvöld um gang mála.
Kl. 20:00 – Liverpool FC sendir frá sér yfirlýsingu
Knattspyrnufélagið Liverpool FC sagði í yfirlýsingu að hugsanir þeirra væru hjá þeim sem urðu fyrir áhrifum atviksins. „Við munum halda áfram að styðja neyðar- og sveitarfélagsyfirvöld á meðan málið er rannsakað.“
Kl. 22:55 – Fjöldi slasaðra staðfestur
Aðstoðaryfirlögregluþjónninn Jenny Sims staðfesti að 27 manns hefðu slasast í árekstrinum, þar af fjögur börn. Einn fullorðinn og eitt barn voru alvarlega slösuð. Um 20 aðrir voru með minniháttar meiðsl. Sims bætti við að ekki væri talið að atvikið tengdist hryðjuverkum.
Hér fyrir neðan má sjá umfjöllun The Sun um málið en viðkvæmir eru varaðir við myndefninu.
Athugasemdir