Frönsk yfirvöld hafa tilkynnt áform um að banna samfélagsmiðla fyrir börn undir 15 ára aldri og banna sölu á hnífum til ungmenna eftir að 14 ára drengur myrti aðstoðarkennara og olli djúpum harmi um allt landið.
Nemandi í skóla var handtekinn á þriðjudag eftir að hafa drepið 31 árs gamlan aðstoðarkennara með hnífi við töskuleit í Nogent í austurhluta Frakklands.
Vinir og syrgjendur lögðu blóm fyrir framan skólann þar sem harmleikurinn átti sér stað. „Við deilum sársauka ykkar,“ stóð á miða sem skilinn var eftir
Laurence Raclot, sem þekkti aðstoðarkennarann Mélanie, sagðist vera „forviða“.
„Hún var frábær með börn,“ sagði Raclot. „Í svona rólegu smábæjarumhverfi hefði enginn getað ímyndað sér að svona gæti gerst.“
Mélanie, sem áður var hárgreiðslukona, hafði farið aftur í nám og starfað í skólanum frá því í september. Hún átti fjögurra ára gamlan son og var sveitarstjórnarkona í þorpi nærri Nogent.
„Það er engin orð til,“ bætti Sabrina Renault við. „Þetta er svo sorglegt fyrir alla fjölskylduna hennar, fyrir litla drenginn sem á nú enga mömmu lengur.“
Nemendur og foreldrar sáust koma og fara úr skólanum, þar sem sett hefur verið upp áfallateymi. Drengurinn verður áfram í haldi lögreglu til fimmtudagsmorguns, að sögn lögregluheimildarmanns AFP í dag. Lítið hefur verið gefið upp um ástæður árásarinnar.
Í kjölfar árásarinnar hafa yfirvöld lofað fjölmörgum aðgerðum til að bregðast við hnífaofbeldi meðal barna.
„Ég legg til að samfélagsmiðlar verði bannaðir fyrir börn undir 15 ára,“ sagði Emmanuel Macron forseti á Twitter í gær. „Samfélagsmiðlarnir hafa getu til að sannreyna aldur. Gerum þetta,“ bætti hann við.
Athugasemdir